Heqja nga qarkullimi i dinarit serb në Kosovë ka ngjallur shumë reagime nga BE dhe SHBA, ku vetëm së fundmi është njoftuar dhe mbajtja e seancës së jashtëzakonshme nga Këshillit të Sigurimit të OKB-së, e thirrur nga Serbia.
Megjithatë një nga zyrtaret e huaja që ka qenë pro vendimit, është eurodeputetja dhe raportuesja për Kosovën në PE, Viola von Cramon.
Ajo e konsideron vendimin e drejtë, por thekson se mbi çështjen duhet të kishte më shumë komunikim paraprak.
“Sipas Kushtetutës së Kosovës, euro është valuta e vetme në Republikën e Kosovës. Pra, në parim, vendimi për përdorimin e dinarit apo të ndonjë monedhe tjetër është absolutisht legjitim dhe nuk duhet kritikuar. Ai duhet të synojë të sigurojë kontrolle të duhura financiare për të shmangur krimet financiare, pastrimin e parave, financimin e terrorizmit, etj. Megjithatë, vendimi aktual për ndalimin e dinarit serb erdhi shumë papritur. Ajo që duhej nga këndvështrimi ynë është komunikimi i duhur, më shumë informacion dhe një periudhë tranzicioni. Në të vërtetë, disa çështje duhet të zgjidhen përpara hyrjes në fuqi të ndalimit, të cilat nga këndvështrimi im duket se nuk janë zgjidhur ende, kështu që vendet e QUINT-it kanë kërkuar ndalimin e zbatimit të vendimit për të lejuar këtë punë të kryhet”, u shpreh eurodeputetja, Viola Von Cramon.
