”Eurosport” analizon ndeshjen me Italinë: Shqipëria t’ia dijë për nder Platinisë për arritjen në Francë, hendek me të mëdhenjtë

Ndeshja historike mes përfaqëesueses shqiptare të futbollit dhe asaj italiane nuk ka kaluar pa marrë vëmendjen dhe të mediave ndërkombëtare.

“Eurosport.com” në versionin italian ka bërë një analizë ku ka nxjerrë 5 të vërtetat që e shfaqura nga ndeshja e mbrëmshme në Palermo. Pavarësisht vëmendjes kryesore te kombëtarja italiane e Venturës, njëra prej të vërtetave është mbi Shqipërinë e De Biazit.

“Që pas kualifikimit në Europian dhe fitores ndaj Rumanisë, është folur shumë për një progres historik të Shqipërisë, dhe me të drejtë. Por fakti është se pa zgjerimin e numrit të pjesëmarrësve në Kampionatin Europian, i realizuar nga ish-presidenti Mishel Platini, kombëtarja e De Biazit do ta shikonte Francën vetëm në hartë.

Progresi i viteve të fundit është i dukshëm: një organizim i mirë, shumë lojtarë që luajnë në Serinë A, një skuadër e aftë për t’u përballur me këdo. Por hendeku që ndan shqiptarët nga më të mëdhenjtë e Europës, siç u pa dhe në ‘Renzo Barbera’, është ende mjaft i qartë”, shkruan “Eurosport”. (E.K/SHUPLAKA)