Fabian Zhilla, profesori dhe studiuesi i krimit të organizuar deklaron se sot duhet të jemi krenar për Medresenë e Shkodrës, pas asaj që ndodhi me mësuesen që propagandonte ISIS-in.
”Sot do ndjehesha krenar të isha nxënës i Medresës së Shkodrës. Në videon e mësueses së medreses në Shkodër, përveç anës negative, askush nuk përmendi se ishin nxënëset e kësaj shkolle ato të cilat e kundërshtuan dhe denoncuan mësuesen “part time”.
Dhe nxënëset kishin një qasje diametralisht të kundërt me “mësuesen”, e cila tregon se idetë e saj ishin të margjinalizuara. Pra në të gjithë këtë ngjarje ka diçka shumë të rëndësishme që na bën të ndjehemi shumë mirë, që nxënëset e medreses, pra e “ardhmja”, e ka shumë të qartë dallimin midis ekstremizmit dhe keqpërdorimit të tij, i cili fshihet pas “universializimit të partikularizmit heroik”.”, shkruan Zhilla.
Ai argumenton më tej se Shkodra ka hapësirë në institucionet shtetërore për të diskutuar çështje sensitive.
”Dhe në anën tjetër, Shkodra, dhe medreseja e saj në këtë video, tregoi që në institucionet arsimore ka hapësirë që çështjet sensitive të diskutohen hapur dhe lirshëm dhe ky është një aspekt emancipues i këtij institucioni edukues. Kjo ngjarje nuk duhet parë vetëm me syzet e “tmerrit”. Mos të harrojmë që ambjentet arsimore janë oaze diskutimi dhe debati, dhe jo rrallë herë diskutimi mund të dalë jashtë binarëve të të qenit politikisht korrekt. Dhe për ta mbyllur këtë koment, ajo që ishte për t’u vlerësuar, ishte mënyrë e të debatuarit që ishte shumë më cilësore se ajo që dëgjojmë në parlament.”, përfundon Zhilla.
Emine Alushi ka marrë masën e sigurisë ”Arrest shtëpie” pasi u prangos për propagandimin e ISIS. ”Është i mirë”, u thoshte në mësim Alushi. (V.G/SHUPLAKA)
