Eurodeputetja sllovene Tanja Fajon, ka vlerësuar edhe një herë tjetër reformën në drejtësi që pritet të zbatohet në Shqipëri, si një hap pozitiv në rrugën e vendit tonë drejt BE-së.
Fajon e ka cilësuar atë një reformë të dëshiruar nga gjithë shqiptarët që do të kthejë besimin e tyre te drejtësia, dhe një hap të rëndësishëm që e bën Shqipërinë një shembull pozitiv nga Ballkani i tensionuar i kohëve të fundit.
Eurodeputetja ka pritur ditën e djeshme në ambientet e Parlamentit Europian një delegacion me të rinjtë social-demokratë të Ballkanit, ku merrnin pjesë edhe përfaqësuesi i Partisë Socialiste Alteo Hysi dhe Kryetarja e LRI-së Floida Kërpaci.
Gjatë një bashkëbisedimi për problematikat aktuale të rajonit, ndërsa shprehu zhgënjimin për retorikën e ashpër dhe nacionaliste të liderëve të Kosovës dhe Beogradit, pas takimit të tyre me Federica Mogherinin ne Bruksel, Fajon mori si shembull pozitiv Shqipërinë, pikërisht për këtë gur- themeli të rëndësishëm për të ardhmen europiane të vendit, reformën në drejtësi.
“Unë u gëzova kur mësova se mbi 90 përqind e shqiptarëve e donin reformën në drejtësi, sepse ata kërkojnë një drejtësi të pavarur.”-mësohet të ketë thënë Fajon ndër të tjera.
Gjatë takimit të organizuar nga grupi i socialdemokratëve në Parlamentin Europian, të rinjtë diskutuan me europarlamentarët Brando Benifei, Victor Negrescu, Tonino Picula, lidhur me perspektivën europiane të vendeve respektive.
Burime për “Shuplaka” bëjnë me dije se dy përfaqësuesit e koalicionit të majtë, Hysi e Kërpaci, kanë sjellë në vëmendje të europarlamentarëve përpjekjet që po bëhen në Shqipëri për përmirësimin e jetës së të rinjve përmes politikave të reja publike me theksin te reforma në arsim, programet e reja të punësimit me bazë merite dhe shanseve të barabarta.
