Një familje shqiptarësh kanë gjetur një sasi të konsiderueshme monetare ndërsa ndodheshin për vizitë në Llogara.
Plot 115 mijë Euro kanë gjetur brenda një çante që e pikasën në zonën ku hidhen parashutat, dhe ndryshe nga sa do kishte vepruar çdo njeri tjetër, i kanë dorëzuar ato në polici.
Policia e Vlorës i ka falenderuar personat për aktin, që shumë pak kush do e bënte, mbi të gjitha në Shqipëri.
Mirëpo pas hetimeve për të zbuluar se kujt i përkiste çanta me paratë, policia ka proçeduar penalisht dy shtetas Ukrainas për mosdeklarim të ardhurash në Pikën e Kalimit Kufitar.
DETAJET E POLICISË
Një familje turistësh shqiptarë në Llogara, gjen një sasi prej 115 mijë Euro dhe i dorëzon në Polici. Policia e Vlorës i falënderon për aktin qytetar.
Policia në përfundim të verifikimeve se kujt i përkiste kjo shumë monetare, ka sekuestruar shumën monetare prej 115 mije Euro dhe ka proçeduar penalisht dy shtetas Ukrainas për mosdeklarim të ardhurash në Pikën e Kalimit Kufitar!
Seksioni i Hetimit të Krimit Ekonomik e Financiar në Drejtorinë Vendore të Policisë Vlorë, kanë nisur hetime intensive lidhur me një çantë personale, në brëndësi të saj me vlera monetare, në një sasi prej 115 mijë Euro, të gjetur në zonën e Llogarasë.
Konkretisht: Çanta është gjetur prej një familjeje turistësh shqiptar në Llogara, në zonën ku hidhen parashutat, dhe e dorëzoi atë pranë struktuarve policore.
Lidhur me këtë çantë në Sallën Opertative Vlorë, ka telefonuar një tjetër shtetas i cili njofton se në Llogara është harruar një çantë me vlera monetare prej dy shtetas Ukrainas.
Në përfundim të hetimeve nga Specialistët e Hetimit të Krimit Ekonomik pas verifikimit dhe identifikimin se kujt u përkiste kjo çantë si dhe prej nga e kanë burimin të ardhurat, të cilat nuk ishin deklaruar nga shtetasit posedues në Pikën e Kalimit Kufitar Rinas kanë nisur proçedimin penal për shtetasit : S.M., 62 vjeçe, dhe P.K., 57 vjeç, banues në Ukrainë.
Policia ka sekuestruar në cilësinë e provës materiale shumën e vlerave monetare.
Materialet u referuan në Prokurori për veprën penale ”Mosdeklarimi në kufi i të hollave dhe i sendeve me vlerë”, parashikuar nga neni 179/a të Kodit Penal. Policia falenderon familjen e cila njoftoi dhe dorëzoi pranë Strukturave Policore çantën e gjetur me vlera monetare për aktin qytetar. (D.D/Shuplaka)
