Familjarët e Ervis Martinajt kanë ankimuar vendimin e GJKKO-së, për sekuestrimin e 34 pasurive të tij, dhe kërkon lirimin e tyre.
Ankimimi është depozituar ne Aeplin e GJKKO, dhe pritet që sot të hidhet shorti për caktimin e gjyqtarit dhe caktimin e një date për shqyrtimin e kësaj kërkese. Kujtojmë se rreth një muaj më parë me urdhër të SPAK sekuestroi pasuritë e tij dhe familjarëve të tij, pasuri që kapin vlerën e miliona eurove, pasi dyshohet se janë vënë nga aktiviteti kriminal. Vendimi erdhi në kuadër të hetimeve për operacionin “Plumbi i Artë” pas arrestimit të Nuredin Dumanit.
Tre prokurorët e çështjes, Altin Dumani, Dolorez Musabelli dhe Behar Dibra kërkuan sekuestrimin e këtyre pasurive me argumentin se ata nuk e justifikojnë burimin e të ardhurave, kërkesë e cila u pranua nga GJKKO. Pasuritë e sekeuestruara janë aksione kompanish, toka, prona, apartamente e makina. Referuar kërkesës së SPAK nën sekuestro janë vënë aksione të 9 kompanive e shoqërive në emër Martinajt dhe familjarëve të tij. 5 automjete; 18 pasuri, arë, ullishte e njësi me sipërfaqe që varjojnë nga 82 m2 deri më 9800 m2; 1 apartament dhe një llogari bankare, kursimet e fëmijëve.
Ervis Martinaj rezulton i zhdukur që prej gushtit të vitit të kaluar pas denoncimit në polici nga familjarët. Ai humbi gjurmët pas dëshmisë së të penduarit të drejtësisë, Nuredin Dumani, ku ndaj tij SPAK caktoi masën e arrestit me burg, pasi sipas institucionit të akuzës kishte kërkuar të vriste Endrit Doklen kundrejt pagesës 500 mijë euro, vrasje e cila nuk u realizua. Pas zhdukjes policia ka zbarkuar disa herë në banesat e Marinajt.
Më datë 26 dhjetor 2022 në Fushë Kuqe të Kurbinit, në dy banesa në pronësi të Martinajt dhe më 7 janar në shtëpinë e tij në Surrel. Gjatë kontrollit në Fushë Kuqe, në shtëpinë e Ervis Martinajt dhe 2 xhaxhallarëve të tij Faik dhe Rakip Martinaj, u gjet arsenal armësh.
Kërkesa për lirimin e pasurive të Martinajt dhe familjarëve të tij, do shqyrtohet nga gjyqtari Dhimitër Lara.
