Arrestimet masive për kanabisin në Vlorë, familjarët të shqetësuar: Janë të pafajshëm, mbledhin sherebel dhe i bien lopatës gjithë ditën

Ditën e sotme është mbajtur seanca për dhënien e masës së sigurisë për 41 të ndaluarit në Vlorë gjatë operacionit anti-kanabis në zonë.

Në ambientet e jashtme të Gjykatës janë grumbulluar familjarë të shumtë të personave të arrestuar të cilët shprehen se të afërmit e tyre nuk kanë lidhje me ngjarjen dhe po mbahen në qeli me të padrejtë dhe në mungesë të provave.

Në një intervistë të dhënë për FaxNews, një grua e cila ka të arrestuar nipin dhe djalin e xhaxhait shprehet se ata janë të pafajshëm dhe nuk kanë lidhje me kultivimin e drogës. Pasi sipas saj nipi mbledh sherebel në Sarandë, ndërsa djali i xhaxhait punon me lopatë gjithë ditën.

“Më kanë marrë nipin Marjus Driza dhe djalin e xhaxhait Dashi Troka dhe kanë tre ditë që i kanë marrë dhe nuk i kanë prurë në shtëpi. Thanë që do t’i marrim për sqarim dhe nuk i sollën më në shtëpi. Në momentin e ndalimit kanë qenë në shtëpinë në fshat në Bishan të Vlorës. Në mëngjes na erdhi policia dhe i mori për sqarim dhe nuk i sollën më.

Nipi ka punuar në sherebel ndërsa djali i xhaxhait në lopatë gjithë ditën. Nipi punon në Sarandë mbledh sherebel, kishte ardhur për Vit të Rid he do ikte të punonte prapë. Janë të pafajshëm, i morën për sqarim dhe nuk i sollën më.”