Është shoqëruar me protesta dhe akuza për vendim politik, seanca gjyqësore te Gjykata e Tiranës për 11 të ndaluarit e protestës së Astirit.
Para godinës së gjykatës, familjarë dhe deputetët e opozitës kanë kërkuar lirimin e të ndaluarve. “Sot është fëmija im nesër është fëmija yt. Ne nuk jemi kriminela”, është shprehur babai i Dorjan Protodurit, duke e cilësuar ndalimin e të birit si një vendim politik.
“Lironi djemtë tanë. Qeveri e krimit. Hajduta. Poshtë komunizmi. Duam shtet. Nuk na trembin dot”, janë disa nga thirrjet e banorëve të Astirit. Në ditën e 22-të të protestës të zhvendosur para ambienteve të gjykatës ishin të pranishëm edhe disa fëmijë.
Në protestën e ditës së sotme ishte e pranishme edhe nëna e 17-vjeçarit, i cili u dhunua disa ditë më parë nga 5 policë. E irrituar nga Rilindja, ajo u shpreh se qeveria vlerëson vetëm kriminelët, ndërsa njerëzit e ndershëm që protestojnë për të drejtat e tyre dhe familjen i arreston.
“Nëse merresh me prostitucion rilindja të bën deputet dhe të promovon. Nëse proteston për të mbrojtur familjen, policia të arreston. Djali im është larguar nga shkolla, policia na provokoi. Djali im paska dhunuar policinë e shtetit që është zero, djali im është minoren. Zoti ia shpërbleftë te fëmijët e tyre se të gjitha këto janë politike“, tha ajo për kamerat e Fax News.
(J.D/Faxweb.al)
Discussion about this post