Plot 13 familje të cilat janë përmbytur nga dalja e lumit Tirana, kanë dalë për të protestuar para Ministrisë së Mirëqenies Sociale. Ata kanë mbetur pa banesa dhe janë strehuar përkohësisht në një palestër. Banorët e “Bregut të Lumit” i kërkojnë kësaj ministrie të japë zgjidhje për çështjen e strehimit.
Burra dhe gra, të moshuar dhe të mitur, kërkuan takim me ministrin Blendi Klosi, i cili u vuri në dispozicion këshilltarët e tij.
Por, ata i kanë adresuar për zgjidhje në Bashkinë e Tiranës, me justifikimin se familjet janë rezidentë në Kamëz.
Dyndja e banorëve të “Bregut të Lumit” në zyrat e Bashkisë Tiranë, i ka habitur punonjësit e këtij institucioni, pasi sipas tyre qytetarët kanë trokitur në derën e gabuar.
Pas sorollatjes për orë të tëra në shumë dyer të shtetit në kërkim të një përgjigje, banorët e “Bregut të Lumit” janë rikthyer edhe një herë në Ministrinë e Mirëqenies Sociale.
Këtë radhë ata patën më shumë fat, pasi në takim u doli vetë ministry Blendi Klosi, i cili u premtoi atyre gatishmërinë e tij për ti ndihmuar në zgjidhjen e këtij problemi.
Bashkia Kamëz që administron zonën e “Bregut të Lumit”, ku jetojnë prej 15 vitesh familjet e përmbytura nuk ka mbajtur përgjegjësi për këtë rast, pasi sipas saj pushteti qendror nuk ka lëvruar fonde për të pastrehët dhe bashkia nuk disponon asnjë fond emergjence.
Banorët e “Bregut të Lumit” i janë drejtuar për ndihmë me anë të një letre edhe kryeministrit Rama, i cili në kthim përgjigje shkruante se çështjen ia kishte deleguar për zgjidhje Ministrisë së Mirëqenies Sociale dhe Rinisë, Ministrisë së Punëve të Brendshme, Prefektit të Tiranës, si dhe Bashkisë Kamëz.
Që prej datës 8 nëntor, 13 familjet e mbetura pa strehë nga dalja e lumit Tirana jetojnë në palestrën e shkollës së mesme “Gramoz Palushi” në Babrru.
