Tifozët e organizuar të skuadrës së Tiranës vazhdojnë protestën e tyre kundër drejtuesve të klubit bardheblu. Grupimi “Tirona Fanatics”, iniciatorët e bojkotit në masë të ndeshjeve të bardhebluve që pasi Partizani u lejua të luante në “Selman Stërmasi”, duket se do ta vazhdojnë gjatë këtë protestë, pavarësisht thirrjeve të vazhdueshëm të klubit për t’u kthyer pranë skuadrës.
Edhe nisma e fundit, ajo e biletave falas për një pjesë të impiantit në ndeshjen kundër Skënderbeut, duket se nuk do të funksionojë. “Fanatics” jo vetëm që nuk kanë ndër mend të shkojnë të organizuar në stadium, por edhe do të vazhdojnë protestën e tyre kundër presidentit Halilit, duke prezantuar edhe një platformë me 7 pika kundër drejtimit të tij.
Postimi i “Fanatics”
Kundër:
- Mashtrimeve dhe premtimeve boshe.
- Përdorimit te KF Tironës për përfitime personale.
- Dështimit në ndërtimin e një klubi të strukturuar dhe serioz.
- Shndërrimit të Tironës në një klub të dorës së tretë.
- Braktisjes së vlerave që KF Tirona përfaqëson.
- Fshehjes së borxheve në mënyrë të pisët dhe mungesës së transparencës ndaj tifozëve.
- Tradhtisë dhe fyerjes së intelektit të tifozëve bardheblu.
#refIK
