Ish-kryeministri Sali Berisha ka denoncuar publikisht, përmes një videoje të bërë virale në rrjetet sociale, një rast të dyshuar të blerjes së votave në zonën e Babrrusë në Tiranë, duke e cilësuar atë si “moment kriminal të ndarjes së parave për vota”.
Në një deklaratë të shpërndarë nga Zyra e Medias dhe Komunikimit e Partisë Demokratike, Berisha akuzoi qeverinë për një “farsë elektorale” dhe për përdorimin masiv të burimeve shtetërore në funksion të blerjes së votës, përpara dhe gjatë ditës së zgjedhjeve.
“Narkoqeveria e Edi Ramës nuk u mjaftua me shpërndarjen e 76 milionë eurove për pensionistët, legalizimet masive, punësimet e jashtëligjshme dhe përdorimin e automjeteve të shtetit. Ajo kaloi në fazën kriminale të shpërndarjes së fshehtë të parave për blerjen e votës,” – u shpreh Berisha.
Sipas tij, pavarësisht përpjekjeve për të fshehur gjurmët, qytetarë të vëmendshëm kanë arritur të filmojnë momentin konkret të shpërndarjes së parave.
“Kjo nuk ndodhi në zonat e thella, por në Tiranë, në mes të kryeqytetit, në Babrru. Videoja flet vetë dhe është provë e qartë e një krimi elektoral të organizuar,” – tha ai gjatë konferencës për shtyp.
Partia Demokratike thekson se ky është vetëm një ndër rastet e shumta të parregullsive dhe presioneve të dokumentuara gjatë procesit zgjedhor, ndërsa i bën thirrje organeve të drejtësisë të veprojnë me urgjencë.
