Policia e Shtetit kohët e fundit ka qenë në qendër të akuzave për lidhjet e saj me politikën dhe krimin. Imazhi i saj është rrënuar mjaft ndikuar kjo edhe nga arratisja e bujshme e disa zyrtarëve nën hetim për drogën në Vlorë.
Po nëse drejtuesit e ministrive janë ndryshuar, kjo nuk e ka bërë më efiçente punën e Policisë, ose të paktën nuk ka një reflektim te ajo që preceptohet nga ana e publikut. Ministri i Brendshëm Fatmir Xhafaj së fundi është mburrur me fitimin e dy çmimeve nga ana e Policisë Shqiptare, por realisht këto operacione kanë ndodhur në kohën e ministrit të Brendshëm nën hetim Saimir Tahiri.
Qendra e Zbatimit të Ligjit për Europën Juglindore vlerësoi me çmimi të parë dhe të dytë, operacionet e zhvilluara në Shqipëri kundër drogës në fillim të këtij viti. Çmim të parë mori operacioni “Koordinimi” dhe të dytë, operacioni “Alias”. I pari u zhvillua në Janar, kur ministër ishte Tahiri dhe tjetri në prill, kur Xhafaj kishte pak javë i emëruar dhe ende nuk kishte filluar mirë nga puna.
E megjithatë kjo nuk e ka penguar Xhafajn të ndihet krenar, pavarësisht se një nga nismat e tij më të përmendura kohët e fundit ‘’Forca e Ligjhit” ende nuk ka peshkuar ndonjë nga peshqit e mëdhenj që i gjithë opinion publik pret.
(E.K/FAXWEB)
