Përfundon me sukses faza e parë e “Giro d’Italia 2025” në Shqipëri.
Etapa e parë e garës, që nisi në Durrës dhe përfundoi në Tiranë, u zhvillua pa incidente dhe me pjesëmarrje të lartë qytetare.
Drejtori i Përgjithshëm i Policisë së Shtetit, Drejtues Madhor Ilir Proda, ka shprehur mirënjohjen për të gjithë punonjësit e Policisë së Shtetit të angazhuar në këtë event, duke veçuar për kontributin e tyre kursantët dhe studentët e Akademisë së Sigurisë.
“Ta shikoje garën ishte spektakolare dhe padyshim pjesë e spektaklit ishte edhe puna dhe përkushtimi i gjithsecilit prej jush,” u shpreh Proda, duke theksuar besimin në profesionalizmin dhe gatishmërinë e forcave të sigurisë për përballimin me sukses edhe të dy fazave të tjera të garës.
Përgjatë gjithë itinerarit, janë marrë masa të shtuara sigurie dhe është siguruar menaxhim efikas i trafikut, duke garantuar mbarëvajtjen e aktivitetit dhe sigurinë e qytetarëve.
Shqipëria vijon të dëshmojë aftësi organizative për pritjen e eventeve ndërkombëtare të përmasave të tilla.
