Analisti Fejzi Hajdari në një intervistë për Fax News zhvillimet e fundit në Ballkanin Perëndimor, në kuadër të Samitit të BE-së të mbajtur në Shkup, ku u diskutua konkretisht plani i ri i zgjerimit dhe mbështetjes ekonomike për rajonin.
Sipas Hajdarit, qasja e Bashkimit Europian është ndjeshëm më serioze dhe konkrete se në të kaluarën, si pasojë e rrethanave të reja ndërkombëtare, përfshirë luftën në Ukrainë dhe tensionet në Bosnje-Hercegovinë dhe në marrëdhëniet Kosovë-Serbi.
“Këtë herë ka një qasje më të vendosur nga Brukseli. Kriza gjeopolitike ka detyruar BE-në të shikojë Ballkanin me sy më praktik. Presim me të vërtetë një integrim të ndjeshëm në gjirin e BE-së,” – deklaroi Hajdari.
Në samit u prezantua nga Eurokomisionerja për Zgjerimin, Marta Kos, një plan i ri rritjeje për Ballkanin Perëndimor, që përfshin: Një paketë prej 6 miliardë eurosh, e cila do të ndahet për shtetet e rajonit, në varësi të ecurisë së reformave, vlerësim të përparimit të secilit vend përmes indikatorëve konkretë, fokus të veçantë në sundimin e ligjit, luftën kundër korrupsionit dhe reformat institucionale.
Kos bëri të ditur se 70% e reformave janë përmbushur, dhe se kësti i parë i fondit pritet të lëvrohet brenda dy javësh, pas analizës së të dhënave nga vendet respektive.
Fejzi Hajdari vuri në dukje se Shqipëria dhe Maqedonia e Veriut ndodhen në kontekste të ndryshme për sa i përket procesit të integrimit.
“Ndërsa Shqipëria ka pasur progres më të qëndrueshëm, Maqedonia e Veriut vijon të përballet me probleme të vjetra rreth identitetit kombëtar dhe fetar, përfshirë çështjen me Kishën Ortodokse Serbe. Këto janë pengesa që e bëjnë rrugën e Shkupit më të ndërlikuar,” – tha analisti.
Megjithatë, ai u shpreh optimist për të ardhmen e rajonit:
“Unë jam i prirur të jem optimist. Bashkimi Europian po tregon më shumë vendosmëri dhe nuk ka më luksin të lërë pas dore Ballkanin,” – shtoi Hajdari, duke iu referuar edhe deklaratës së kryeministrit Edi Rama, i cili gjatë samitit tha se “do të bashkohemi në BE”.
