Në një lidhje skype për Fax News, Florinda Zegullaj, përfaqësuese e nismës “Lumturo Dhimbjen”, në ditën ndërkombëtare të autizmit është shprehur se në vendin tonë nuk ka qendra të mirëfillta për trajtimin e fëmijëve me këtë diagnozë.
Zegullaj në intervistën e saj me gazetaren Sedjana Huna është shprehur se ajo ka një fëmijë 11 vjeç në lidhje me këtë diagnozë por e vërteta është se në ndërgjegjësimi është tjetër gje dhe përballja me një individ të tillë është shumë e vështirë.
“Kryesore nuk është vetëm marrja e një terapie po kërkohen edhe shërbime cilësore. Në qendrat private shërbimet që ofrohen nuk janë të surpervizore nga organet shtetërore, jemi vertet në kushte të vështira. Flasim shumë për informimin dhe ndërgjegjësimin, por kur përballemi me individë me autik nuk dimë më si të sillemi. Ne si prindër nuk i gjejmë dot mënyrat e duhura për tu përballur me këto situata në shkolla pavarësisht se fëmijët janë empatike nuk dinë se si të përfshijnë fëmijët në aktivitetet e tyre. As mësuesit nuk kanë trajnimet e duhura”, ka thene ajo.
Ndër të tjera ajo është shprehur se përveç Tiranës në Korçë dhe në qarqet e tjera të vendit nuk ekzistojnë qendra të tilla trajnimi për fëmijët me këtë diagnozë.
“Në Korçë jemi mbështetur vetëm te prindërit pasi mbështetja kryesore janë prindërit tanë dhe ora e trajnimit personale. Numri i fëmijëve autikë ka një rritje të madhe para pak vitesh ishte dhe turp që ta pranoje se ke një fëmijë autike. Megjithatë ka një nismë që na ka bërë bashkë për të bërë ndryshimin e politikave sociale. Por problemi më madhor është kur të mos jemi ne më në jetë, ku do i dërgojmë. Mungesa e qendrave për këto fëmijë është e madhe ndaj duhet që të merren patjetër masa.
Sapo i mësova diagnozën e fëmijës kam marrë ndihmë nga psikologët për të mësuar sesi të sillem me fëmijën tim pasi ai ka pasur edhe një tjetër diagnozë të mbivendosur atë të hiperaktivitetit, që ka qenë e vështirë me e ulur edhe 5 minuta në tavolinë. Edhe tashmë unë jam në kontakt të përhershëm me psikologen e shkollës. Ne si shoqëri kemi një përceptim të gabuar në lidhje me fëmijët autik. Ne duhet që ti pranojmë dhe ti mirëpresim këto fëmijë dhe kur jemi në situata të tilla ti pranojmë dhe ti duam siç janë pasi bukuria e jetës qëndron te diversiteti”, ka thënë ajo.
