Një grup fëmijësh në këtë fundvit kanë vizituar Bazën e Mbështetjes për Emergjencat Civile (BMEC), që sipas ministrit të Mbrojtjes Pirro Vengu “kanë sjellë gëzim dhe dritë në këtë repart të rëndësishëm”.
Nëpërmjet një postimi në rrjetet sociale ministri Vengu thekson se me “kureshtjen dhe entuziazmin e tyre, ata eksploruan mjediset e punës së efektivëve, u njohën nga afër me pajisjet moderne dhe përjetuan emocionin e pjesëmarrjes në demonstrime emergjencash”.
Vengu nënvizon më tej se kjo më shumë sesa një vizitë, ishte një hap drejt ndërtimit të një të ardhmeje më të sigurt, ku fëmijët e sotëm frymëzohen të bëhen profesionistët e përkushtuar të së nesërmes.
“Ata mësuan se siguria dhe mbrojtja janë një përpjekje e përbashkët, ku secili prej nesh ka një rol të rëndësishëm”, shkruan Vengu.
