Fermerët e Kafarajt kanë dalë në protestë dhe kanë bllokuar autostradën Levan-Tepelenë.
Fax News raporton se kjo është e hera e dytë që fermerët kanë protestuar, pasi nuk janë dëmshpërblyer pas përmbytjeve në serat e luleshtrydheve.
Mësohet se fermerët kanë dalë në autostradë duke protestuar, dhe kërkojnë nga qeveria të kthejë vëmendjen tek qindra fermerë, serat e të cilëve janë shkatërruar nga përmbytjet e 2 dhjetorit dhe 4 shkurtit të këtij viti.
Sipas fermerëve janë shkatërruar jo vetëm kulturat bujqësore por edhe serat duke e bërë të pamundur zhvillimin e mëtejshëm të aktivitetit.
Dëmet e secilit fermer llogariten të jenë në miliona lekë deri më sot si pasojë e dy përmbytjeve.
Fermerët shpehen për gazetarin e Fax News, Edmond Hoxhaj se jo vetëm që nuk kanë pasur dëmshpërblime nga qeveria, por as verifikim të dëmeve nga ndonjë komision vendor.
Ata theksuan se kërkojnë zgjidhje përfundimtare për parandalimin e përmbytjeve në të ardhmen duke fajësuar argjinaturën e superstradës Levan-Vlorë, si shkaktare të përmbytjeve.
(F.M/Faxweb)
https://www.youtube.com/watch?v=RxzLyuG8ZU4&feature=youtu.be
https://www.youtube.com/watch?v=ql0MrXetcjA&feature=youtu.be
