Fermerët e fshatit Bliçë në Berat janë ngritur në protesta ditën e sotme, për shkak se prej më shumë se dy muaj nuk mund të përdorin rezervuarin e fshatit për ujitjen e tokave bujqësore.
Sipas fermerëve ujëmbledhësi po shfrytëzohet si rezervuar peshku, nga një banor i vetëm i fshatit dhe tharja e prodhimit bujqësor po i çon drejt falimentimit pasi kanë pësuar mjaft dëme ekonomike.
“Rezervuari ishte në funksion të vaditjes së bujqësisë. Ishte një ndihmë për bujqësinë dhe jo një vaskë peshkimi. Del një njeri këtu e paguan edhe nënshtron fshatin.”, është shprehur një fermer, citon Ora News.
Këto deklarata të fermerëve i ka përforcuar edhe më tej kryeplaku i fshatit Agron Çuçeni.
“130 ha tokë, e përsëris prapë dhe shumë rrënjë ullinj që ka kanali. Sivjet nuk është vaditur as 40%.”, janë fjalët e tij.
Ndërkohë, nënkryetari i bashkisë Berat, Bledar Blana thotë se kufizimi i furnizimit me ujë të fermerëve është bërë pikërisht me urdhër të perfektit të qarkut.
“Ne jemi munduar që ky rezervuar me këto prurje të pakta që ka të kishim si një pikë furnizimi me ujë jo vetëm të popullatës, por edhe në rast zjarresh të helikopterit, i cili edhe në zjarrin e fundit që ndodhi u furnizua në këtë rezervuar.”, thotë Blana. (D.D/Shuplaka)
Discussion about this post