Sporti i kajakut në lumenjtë e ndryshëm në Shqipëri po tërheq gjithnjë e më shumë vëmendjen e turistëve vendas, por edhe të huaj.
Kryeministri Edi Rama ndau në rrjetet sociale momente nga Festivali i Kajakëve, që u zhvillua në lumin e Valbonës.
Ky sport ujor mblodhi këtë fundjavë një numër të lartë të pasionuarish vendas dhe nga shtete të ndryshme të Evropës, të cilët lundruan me kajak në lumin e Valbonës.
Festivali i Kajakëve në Lumin e Valbonës ka mbledhur rreth 80 pjesëmarrës në Tropojë me pjesëmarrje nga Shqipëria, Kosova, Italia, Bullgaria, Austria dhe Gjermania.
Përveç pjesëmarrjes në gara sportive me kajakë, ky festival shërben edhe për promovimin e turizmit në Luginën e Valbonës.
Lugina e Valbonës është zona turistike më e vizituar në rrethin e Tropojës, madje nga më të vizituarat në Alpet shqiptare pas luginës së Thethit.
E njohur për peizazhet e saj piktoreske dhe biodiversitetin e pasur, është një destinacion i popullarizuar për turizmin e natyrës dhe sportet e aventurës1. Me një klimë malore dhe temperaturat që rrinë të moderuara gjatë verës, ky park kombëtar ofron kushte ideale për aktivitete në natyrë1.
Kaltërsia e Valbonës është si e asnjë lumi tjetër. Teksa udhëton, kaltërsia e lumit të magjeps, ndërkohë në të dy krahët ngrihen malet e larta.
Çdo vit numri i vizitorëve vendas dhe të huaj ka pësuar rritje në Luginën e Valbonës, të cilët njihen edhe me bukuritë natyrore, historinë, zakonet apo traditat e fshatrave më veriorë të vendit.
