Drejtoria Vendore e Policisë Fier, në vijim të punës për parandalimin, evidentimin dhe goditjen e paligjshmërisë, ka kryer disa veprime hetimore dhe arrestime për vepra të ndryshme penale gjatë 24 orëve të fundit.
Aksident rrugor në gjendje të dehur – Një shtetas në pranga
Specialistët e Qarkullimit Rrugor arrestuan në flagrancë shtetasin M. S., 28 vjeç, banues në Berat, pasi në fshatin Strum, automjeti që ai drejtonte në gjendje të dehur është përplasur me një mjet bujqësor që drejtohej nga shtetasi M. K., 37 vjeç. Si pasojë e përplasjes, është dëmtuar pasagjerja në mjetin bujqësor, M. K., 63 vjeçe, e cila ndodhet në spital nën kujdesin e mjekëve.
Shkelje e masës “Arrest në shtëpi” dhe dhunë në familje – Një arrestim
Specialistët për Hetimin e Krimeve në Komisariatin e Policisë Lushnjë arrestuan në flagrancë shtetasin K. M., 66 vjeç, banues në Lushnjë, i cili u kap jashtë banesës, ndonëse ndodhej nën masën e sigurisë “Arrest në shtëpi”, për veprat penale:
- “Dhuna në familje”,
- “Veprime në kundërshtim me vendimin e Gjykatës” dhe
- “Drejtimi i mjetit në mënyrë të parregullt”.
Konflikte dhe vepra të tjera penale – Procedime në Lushnjë dhe Fier
- U referuan materialet në Prokurori për shtetasit Y. S., 60 vjeç dhe A. S., 56 vjeç, banues në Karbunarë e Vogël, që dyshohet se janë konfliktuar për motive pronësie me shtetasin I. S., 63 vjeç.
Në Fier:
- U arrestua në flagrancë shtetasi E. Sh., 30 vjeç, banues në Vlorë, pasi dyshohet se ka vjedhur një biçikletë në pronësi të një 24-vjeçari;
- U procedua penalisht shtetasi P. H., 54 vjeç, banues në Frakull e Madhe, pasi dyshohet se ka djegur një kavaletë me bar në pronësi të një 67-vjeçari;
- U shpallën në kërkim dhe u referuan materialet për:
- G. L., 33 vjeç, që dyshohet se ka goditur me grushte një shtetas 30 vjeç, për motive të dobëta;
- E. H., 32 vjeç, që dyshohet se ka ushtruar dhunë ndaj bashkëjetueses së tij. Punohet për kapjen e tyre.
Dhunë ndaj të miturve dhe kërcënime kibernetike
- Në Divjakë, u procedua penalisht shtetasi M. T., 41 vjeç, pasi dyshohet se ka ushtruar dhunë ndaj djalit të tij 9-vjeçar.
- Specialistët për Hetimin e Krimeve Kibernetike referuan materialet në Prokurori për shtetasen A. P., 29 vjeçe, banuese në Fier, pasi dyshohet se ka kanosur një shtetas 30 vjeç nëpërmjet rrjeteve sociale.
Dëmtim prone në Patos
Në Stacionin e Policisë Patos, shtetasi H. G., 34 vjeç, banues në lagjen “Grizë”, kallëzoi se gjatë natës është dëmtuar fasada e lokalit të tij, ndërsa lokali ka qenë i mbyllur. Po punohet për sqarimin e rrethanave dhe identifikimin e autorëve.
Të gjitha materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme hetimore.
