Një ngjarje e rëndë është shënuar paraditen e djeshme në fshatin Shtyllas të Fierit, ku një shtetas është plagosur rëndë me mjet prerës pas një konflikti për motive të dobëta.
Sipas të dhënave zyrtare nga Policia e Fierit, menjëherë pas njoftimit për incidentin, shërbimet e Komisariatit kanë shkuar në vendngjarje dhe kanë bërë të mundur kapjen e njërit prej autorëve të dyshuar, shtetasi Pashuk Paluca, 63 vjeç.
Nga hetimet paraprake rezulton se Pashuk Paluca dhe djali i tij Ndue Paluca, 40 vjeç, banues në fshatin Shtyllas, gjatë një konflikti për motive të dobëta, kanë goditur me sopatë shtetasin Llesh Marku, 58 vjeç, i cili është transportuar në spital dhe ndodhet nën kujdesin e mjekëve.
Në përfundim të veprimeve procedurale, specialistët për Hetimin e Krimeve Kundër Personit bënë arrestimin në flagrancë të Pashuk Palucës, për veprën penale “Vrasje me paramendim”, e kryer në bashkëpunim, e mbetur në tentativë.
Ndërkohë, po punohet intensivisht për lokalizimin dhe arrestimin e djalit të tij, Ndue Paluca, i shpallur në kërkim.
Policia ka sekuestruar në cilësinë e provës materiale mjetin prerës (sopatë), që u përdor gjatë sulmit.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme ligjore.
