“Për Maqedoni të përbashkët” është iniciativa qytetare që ka deklaruar sot se protestat kundër zyrtarizimit të gjuhës shqipe do t’i zgjerojë në të gjithë teritorin e Maqedonisë. Përveç Shkupit, do të protestohet edhe në katër qytete tjera, si në Prilep, Kërçovë, Kumanovë dhe Shtip.
Draft-ligji për gjuhët ishte kushti që vunë partitë e shqiptarëve të Maqedonisë duke zbatuar atë që njihet si marrëveshja e Tiranës, për të bërë kryeministër Zaevin dhe për ti dhënë LSDM-së shumicën e nevojshme parlamentare për të krijuar qeverinë.
Ai parashikon përdorim të gjerë të shqipes në Kuvend, qeveri, pushtetit gjyqësor, jurisprudencë, në dokumentet personale, organet e sigurisë, përfshirë edhe komunat ku nuk ka popullatë shqiptare, por në rastet kur shqiptarët u drejtohen atyre për marrjen e shërbimeve personale.
Nikolla Gruevski, kryetari i VMRO-DPMNE, ka deklaruar se kërkesa e shqiptarëve për zyrtarizmin e shqipes nuk do të ndalet me kaq, madje ai i propozoi kundërshtarit të tij që ia jepte VMRO-ja votat vetëm që mos plotësonte kërkesat e shqiptarëve.
Ai ka thënë se është i gatshëm të pranojë edhe “të arrestohet” vetëm të mos rrënohen “themelet e shtetit maqedonas”.
“Le të më arrestojnë, të më burgosin, le të më keqtrajtojnë, vetëm të mos rrënojnë shtetit dhe themelet e tij”, thuhet në komunikimin publik të Nikolla Gruevskit. (M.D/ Shuplaka)
