Policia e Shtetit, në bashkëpunim me SPAK, Eurojust dhe Europol, ka finalizuar fazën e saj në operacionin ndërkombëtar të koduar “Platforma”, që kishte në fokus goditjen e një grupi kriminal të përfshirë në mashtrime përmes platformave të rreme investimesh online.
Operacioni, i cili është zhvilluar në disa shtete si Gjermania, Shqipëria, Qipro dhe Izraeli, u koordinua nga autoritetet gjermane dhe u mbështet nga agjencitë evropiane të zbatimit të ligjit.
Në Shqipëri, Drejtoria për Hetimin e Krimeve Kibernetike dhe DVP Operacionale, nën drejtimin e SPAK, ekzekutuan vendimet e Gjykatës së Posaçme duke ushtruar kontrolle në tre ambiente të ndryshme në Tiranë.
Gjatë kontrolleve u sekuestruan:
-
2 aparate celularë
-
1 laptop
-
1 njësi kompjuterike
-
1 USB
-
1 hard disk i jashtëm
-
Një shumë prej 40 020 eurosh
Hetimi është zhvilluar në kuadër të një letërporosie të lëshuar nga autoritetet gjermane.
Grupi kriminal dyshohet se ka mashtruar mbi 100 viktima, duke shkaktuar një dëm financiar mbi 3 milionë euro.
