Ambasadori i Rusisë në Tiranë Aleksandër Karpushin ka reaguar pas akuzave mes qeverisë dhe opozitës për çështjen e kontratave të lobimit të PD-së të financuara nga rusia.
Në një intervistë për emisionin “Java” në RTSH, thotë se është habitur me qëndrimin e disa qeveritarëve që përpiqen të demonizojnë Rusinë me një retorikë të ngjashme me atë të Enver Hoxhës.
“Kohët e fundit na kanë habitur jashtë mase përpjekjet e disa mediave shqiptare, por edhe të disa përfaqësuesve të organeve shtetërore, për demonizimin e Rusisë. Të krijohet përshtypja që qëllimi i tyre është për të bindur qytetarët shqiptarë se vendi ynë është një “perandori e së keqes”, ndërsa “rus” do të thotë “armik”.
Deklaratat e fundit që kemi dëgjuar për “tentakulat e Moskës”, të cilat gjoja janë shtrirë në të gjithë rajonin e Ballkanit, ngjanë më së shumti me retorikën e kohës së Enver Hoxhës, por aspak me deklaratat e politikanëve të një vendi modern dhe demokratik.
Po të vazhdojmë të ecim me këto ritme, mund të arrijmë në një pikë kur edhe adhuruesit e Dostojevskit dhe Tolstoit do të stigmatizohen si “agjentët e Kremlinit”. Në mendimin tim, kjo është një tendencë shumë e rrezikshme” – tha Karpushin.
Gjithashtu ai mohoi përfshirjen e qeverisë ruse në zgjedhjet amerikane apo të çdo lloj vendi tjetër në politikën e brendshme.
(M.Q/Faxweb)
Discussion about this post