Prej disa ditësh banorët e Dragobisë në Tropojë janë ngritur në protestë kundër vijimit të ndërtimeve të HEC-eve nga ana e kompanisë Gener 2.
Shpërthimet e kryera nga kjo kompani me mina kanë tmerruar banorët e zonës, dhe kanë shkaktuar dëme të shumta në shtëpitë e tyre. Mirëpo një vendim i rëndësishëm është dhënë sot nga ana e Gjykatës së Apelit.
Faxweb.al ka siguruar vendimin e gjykatëses Rilinda Selimi, e cila ka vendosur pezullimin e punimeve deri në momentin kur çështja të jetë shqyrtuar në themel.
Gjykata vendosi: “Pranimin e Kërkesës për marrjen e masës së sigurimit të padisë, duke kërkuar pezullimin e punimeve në zbatim të aktit administrativ, Vendimit të K.K.T, Nr. 12, dt 10. 11 2017, “Për miratimin e shtyrjes së Lejes së Ndërtimit të Hidrocentralit Dragobia, Komuna Margegaj Qarku Kukës, deri në përfundimin e gjykimit”.
Tashmë kompania dhe organet ligjzbatuese janë të detyruar që të ndërpresin punimet, deri në një vendim përfundimtar të dhënë nga ana e gjykatës së apelit. Vendimi hyn në fuqi gjatë ditës së sotme, pasi sapo është bërë publik nga ana e Gjykatës.
Ka qenë shoqata TOKA dhe 27 aktivistë ata që kanë kërkuar pranë gjykatës së apelit ndalimin e punimeve. Më herët kërkesa e tyre ishte rrëzuar në Gjykatën Administrative.
Sado e vogël, kjo është një fitore për të gjithë banorët e Valbonës, kërkesa e vetme e të cilëve ishte një dhe e vetme ‘’na lini të jetojmë’’.
Ata janë shprehur se ndërhyrjet në shtratin e Valbonës, ku do të ndërtohen hidrocentralet do të ishin shumë të dëmshme për të gjithë mjedisin e zonës, dhe do të dëmtonin ndjeshëm imazhin e vendit, që është shumë i vizituar nga ana e turistëve.
(E.K/FAXWEB.AL)
