Situata në vendgrumbullimin e mbetjeve në bashkinë Elbasan mbetet alarmante edhe në orët e vona të natës. Zjarri që ka përfshirë masivin e mbetjeve është thelluar dhe ka zënë përmasa shqetësuese, duke përfshirë më shumë se gjysmën e sipërfaqes.
Flakët janë të përqendruara në thellësi të mbetjeve, çka e bën ndërhyrjen tepër të vështirë dhe të rrezikshme. Aktualisht, në operacion janë të angazhuara 7 mjete zjarrfikëse, 4 fadroma, 2 ekskavatorë dhe 11 mjete të tonazhit të rëndë. Në terren ndodhen 25 efektivë zjarrfikës, 10 punonjës të subjektit të inceneratorit si dhe 8 punonjës të bashkisë së Elbasanit.
Puna po zhvillohet në mënyrë të alternuar, duke përdorur të gjitha kapacitetet logjistike për të lokalizuar dhe shuar vatrën e zjarrit. Autoritetet kanë konfirmuar se operacioni do të vijojë gjatë gjithë natës deri në neutralizimin e plotë të flakëve.
Për shkak të përmasave të mëdha të zjarrit dhe përhapjes së tymit, qytetarët në zonat përreth këshillohen të shmangin qëndrimin afër vendgrumbullimit dhe të ndjekin njoftimet zyrtare. Bashkia e Elbasanit dhe shërbimi zjarrfikës janë në gatishmëri të plotë dhe vlerësojnë mundësinë e përforcimit të forcave nëse situata e kërkon.
