Ambasadorja amerikane në Shqipëri ka reaguar menjëherë pas përfundimit të manifestimit të thirrur nga Presidenti Meta.
“U surprizova nga flamujt amerikanë në manifestimin e sotëm, por që të sqarojmë çdo ngatërresë, ndonëse qeveria amerikane mbështet çdo protestë paqësore, ne nuk kemi asnjë lidhje me ‘manifestimin’ e sotëm”, shkruan ajo në Twitter.
Sot në orët e pasdites mijëra qytetarë iu bashkuan thirrjes së Ilir Metës për të dalë në mbrojtje të Kushtetutës dhe mbrojtjes së lirisë dhe demokracisë në vend, e rrezikuar prej mazhorancës aktuale e cila sipas kreut të shtetit, po kap të gjitha institucionet e pavarura.
Sot Meta pas përfundimit të fjalimit të ashpër firmosi dekretin për kthimin mbrapsht të ligjit për betimin e anëtarëve të Gjykatës Kushtetuese, votuar nga Kuvendi i Shqipërisë. Ndërkohë në një votim popullor në sheshin para Presidencës, Meta pyeti manifestuesit nëse ishin për shpërndarjen e Parlamentit.
Do rikthehemi sërish për dekretin e dytë tha Meta dhe do ta firmos në mes të Parlamentit, aty ku bëhet dhe ‘grushti i shtetit’. Ai i la afat mazhorancës qeverisëse datën 15 mars, kohë kur pritet të mbyllet dhe reforma zgjedhore, për të hequr dorë nga aktet e saj antishtet.
