Zgjedhjet e qershorit do të jenë padyshim një test shumë i rëndësishëm përsa i përket aspiratave të vendit tonë në procesin e Integrimit. Prej kohësh çelja e negociatave ka hasur në një ngërç pa patur një datë fikse për çeljen e tyre.
Ndërkohë dje Komisioni i Punëve të Jashtme të Parlamentit Europian miratoi projektrezolutën e Knut Fleckenstein për Shqipërinë. Raportuesi për Shqipërinë thekson se implementimi i reformës në drejtësi është jetik për vendin dhe se tashmë nuk mjafton vetëm ana teorike e saj. Sa i përket çështjes së hapjes së negociatave të vendit tonë me qëllim integrimin në Bashkimin Europian, Fleckenstein u shpreh se kjo mund të ndodhë pas zgjedhjeve të qershorit.
Me 52 vota pro, 6 kundër dhe 4 abstenim Komisioni i Punëve të Jashtme të Parlamentit Europian ka aprovuar draft-rezolutën e raportuesit Knut Fleckenstein për Shqipërinë. Reforma në drejtësi është çelësi kryesor i progresit të vendit tonë, por sipas Fleckenstein, rëndësi të veçantë ka implementimi i saj.
“Ne jemi shumë të lumtur që reforma në drejtësi ka kaluar në parlament dhe që u pranua nga Gjykata Kushtetuese, kështu që tani vjen ana tjetër e medaljes. Ne bëjmë thirrje sigurisht për të shkuar përpara, për ta implementuar reformën, sepse suksesi i vërtetë qëndron në implementimin e saj dhe jo vetëm i shkruar në letër. Di që ka nisur një proces nën monitorimin e ndërkombëtarëve dhe jam i lumtur për këto zhvillime”, tha Fleckenstein. Sa i përket çështjes së hapjes së negociatave të vendit tonë me qëllim integrimin në Bashkimin Europian, Fleckenstein shprehet se kjo mund të ndodhë pas zgjedhjeve të qershorit. “Nëse reforma në drejtësi nis të implementohet menjëherë, pas zgjedhjeve të qershorit mendoj se do të kemi edhe hapjen e negociatave, duke shpresuar që komisioni të jetë dakord. Monitorimi në këtë rast nuk është i nevojshëm, sepse ne kemi besim tek parlamenti dhe autoritet shqiptare”, tha Fleckenstein. (E.K/SHUPLAKA)
Discussion about this post