Avokati i Dashamir Tahirit, Fatmir Braka, ka bërë me dije se pas vendimit të Komisionit Qendror të Zgjedhjeve, reagimi ka qenë i menjëhershëm, duke ankimuar fillimisht çështjen e klientit të tij në Kolegjin Zgjedhor dhe së fundmi tek Gjykata Administrative.
“Kemi kërkuar pezullimin e vendimit të KQZ-së deri sa të merret vendimi përfundimtar. Ai është i pakigjshëm. Argumentat janë ato që parashtruam në KQZ. Tahiri do vazhdojë të jetë deputet deri në vendimin e formës së prerë të Gjykatës. Mund të çojmë në Kushtetuese ligjin e dekriminalizimit, ka absurditet.”, është shprehur ndër të tjera avokati Braka.
Komisioni Qendror i Zgjedhjeve i hoqi mandatin deputetit Dashamir Tahiri pasi gjeti shkelje në formularin e Dekriminalizimit.
Në fjalën e tij, në mbledhjen e parë të KQZ-së për shqytimin e mandateve të dy deputetëve dhe kryebashkiakut Rroshi, avokati Fatmir Braka parashtroi arsyet përse Dashamir Tahirit nuk duhej t’i hiqej mandati.
“Ai u gjykua në mungesë në Itali, por dënimi u deklarua tërësisht i falur sapo u dha. Vepra për të cilën ai është dënuar Tahiri s’përfshihet në veprat e specifikuara si ndaluese.
Dashamir Tahiri është gjykuar në mungesë. Nuk ka ekzistuar dënim me burgim dhe në rastin e Tahirit nuk ekzistojnë rrethana për kryerjen e veprave penale.”, shprehej ndër të tjera Braka.
Dashamir Tahiri u konsiderua si surpriza e Prokurorisë më 20 dhjetor, ditë kur Prokuroria bëri publikë tre emrat që preken nga dekriminalizimi.
Deputeti Dashamir Tahiri akuzohet se nuk ka deklaruar në formularin e “Dekriminalizimit” dy dënime, përkatësisht një e vitit 1995, për të cilën është raportuar nga Policia në Foggia për “krime lidhur me falsifikimin e parave” dhe në vitin 2009 dënuar me 9 muaj burgim për përdorim “leje drejtimi shqiptare të falsifikuar”. (XH.A/SHUPLAKA)
Discussion about this post