Zgjedhja e Ilir Metës president i ri i republikës është shoqëruar me dhjetra reagime nga politikanë, anëtarë të LSI-së, analistë e shumë reagime ka patur në rrjete sociale.
Por i pyetur nga ”Shuplaka”, ministri i LSI-së, Lefter Koka, flet sërish për ngjarjen e papritur, votimin me 87 vota pro që bëri Metën president.
Sipas Kokës, Meta do të jetë presidenti i stabilitetit politik dhe se kreu i LSI-së ka marrë një detyrë me detyrim madhor ndaj shqiptarëve.
”Siç e thashë dhe në komunikimin tim social do të jetë presidenti i stabilitetit politik. Jam i bindur se Meta mori një detyrë me detyrim madhor ndaj shqiptarëve.”, thotë Koka.
Qe shumë e shpejtë zgjedhja e Metës, që pas sinjaleve të forta të kreut të Grupit Parlamentar të PS-së, Gramoz Ruçi në Kuvend, se tashmë duhet ta zgjidhnin presidentin e ri. Meta u propozua nga 23 deputetë për të qenë presidenti i ri i vendit, por që para zgjedhjes së tij, nisën të përfliteshin emrat që do drejtonin LSI-në. Sipas statutit, LSI-ja do të vazhdojë të drejtohet nga nënkryetari i saj, Petrit Vasili, njëkohësisht ministër i Drejtësisë.
Dje në mbrëmje LSI-ja organizoi mbledhjen e kryesisë, dhe Koka, ndryshe nga shumë skeptikë për çfarë do ndodhë me LSI-në tani që kreu i saj u bë president, ka një tjetër parashikim. Sipas ministrit, Meta ka shokë, të cilët do të punojnë fort për zgjedhjet e ardhshme, pse jo dhe me urimin që të jetë Meta që të dekretojë qeverinë e parë të LSI-së.
”Unë besoj se Meta ka shokë e unë jam një nga ta, që do bëj që LSI të mbajë e të çojë më lart kontributin politik e shoqëror.
Them me bindje e garanci se sot shqiptarët kanë një njeri me integritet që jep siguri kombëtare e rajonale. Unë do i uroja Ilirit shëndet e familjes së tij të ndjehen krenar.
Së fundmi, dua të nënvizoj se ne sot jemi shumë për të dhënë kontributin e nevojshëm politik. Uroj president që të jeni ju që të dekretoni kabinetin e parë të LSI!”, thotë më tej për ”Shuplaka”-n, Lefter Koka. (V.G/SHUPLAKA)
