Kandidati për deputet, Ilir Alimehmeti, në një intervistë për FaxNews, ka ngritur akuza për procesin zgjedhor dhe evidentoi shkelje të rënda që, sipas tij, kanë deformuar vullnetin e qytetarëve.
Duke iu referuar raportit të OSBE-ODIHR, Alimehmeti theksoi se zgjedhjet në Shqipëri nuk ishin as të lira dhe as të ndershme.
“Në radhë të parë duhet të kujtojmë faktet, të kujtojmë raportin e OSBE-ODIHR që tregon qartë se zgjedhjet ishin të parregullta. Falja e gjobave para zgjedhjeve ishte një akt i paramenduar për të ndikuar votën. Këto janë të gjitha të dokumentuara.” – deklaroi Alimehmeti.
Ai përmendi raste konkrete të manipulimeve në terren, përfshirë situata skandaloze në Elbasan, ku një minimarket ishte kthyer në një qendër votimi të fshehtë.
“Njerëzit votonin pas makinerisë së ekspresit. Ishte e pamundur të kuptoje që aty bëhej procesi i votimit. Janë shkelje flagrante të ligjit zgjedhor dhe janë provuar me pamje dhe dëshmi”, -shtoi kandidati i opozitës.
Sipas Alimehmetit, në qarkun e Elbasanit janë konstatuar fletë votimi pa vula zyrtare dhe raste ku njerëzit figuronin si votues pa qenë fare të pranishëm.
“Këto nuk janë thjesht parregullsi, janë fakte që tregojnë se zëri i votuesve nuk është dëgjuar e përfaqësuar realisht në kuti. Kërkojmë rinumërim të plotë dhe hetim të thelluar”, – u shpreh ai.
Alimehmeti theksoi se opozita nuk mund të zëvendësojë as gjykatat dhe as policinë, por theksoi nevojën që institucionet të reagojnë me përgjegjësi ndaj provave që janë bërë publike.
Ai gjithashtu përmendi një rast të cilësuar nga ai si i pazakontë të tashmë deputetes të përzgjedhur në Elbasan, Sara Mila, që sipas tij ka dalë me më shumë vota se ç’është e mundur. Thënë kjo për Alimehmetin ky është shembull i qartë i manipulimit dhe deformimit të rezultatit.
“Nëse ne vijojmë ta normalizojmë këtë realitet, atëherë u japim të drejtë atyre shqiptarëve që janë larguar nga vendi. Kjo është fatkeqësi kombëtare. Vota duhet të jetë e shenjtë dhe jo një farsë”, përfundoi ai.
