Shefja e Zyrës së BE-së në Kosovë, Nataliya Apostolova, ka deklaruar se është përgjegjësi e liderëvë politikë që të dëgjojnë qytetarët dhe të formojnë një qeveri të qëndrueshme.
Ajo këtë deklaratë e bëri duke pasur parasysh sfidat e rëndësishme para të cilave gjendet shteti i ri i Kosovës. Duke radhitur disa nga problemet si papunësia e lartë dhe sistemi arsimor me performancë të ulët, deri te korrupsioni dhe sundimi i dobët i ligjit, Apostolova ka theksuar se është e rëndësishme që liderët politikë t’i marrin seriozisht këto sfida, të formojnë një qeveri të fortë dhe të fillojnë reformat që populli i kërkon.
“E përgëzoj popullin e Kosovës për mbarëvajtjen e zgjedhjeve që u mbajtën më 11 qershor dhe Komisionin Qendror të Zgjedhjeve për mënyrën profesionale me të cilën i kryen detyrat e tyre. Gjithashtu u bëj thirrje institucioneve përgjegjëse që t’i marrin seriozisht rekomandimet e Misionit të BE-së për Vëzhgimi e zgjedhjeve dhe t’i zbatojnë ato në mënyrën e duhur”, ka deklaruar Apostolova.
Ajo duke përmendur takimin jozyrtar që ka patur Federica Mogherini, me presidentin e Serbisë dhe atë të Kosovës, dhe kjo sipas saj, edhe një herë rikonfirmon angazhimin e BE-së për perspektivën e Kosovës dhe Serbisë drejt BE-së, ku pritet zbatimi pa vonesë i marrëveshjeve të arritura gjatë dialogut.
“BE-ja do të vazhdojë të ndihmojë qytetarët e Kosovës. Përmes Marrëveshjes së Stabilizim Asociimit dhe instrumenteve të lidhura me të, BE-ja ka siguruar një kornizë politike, ekonomike dhe legjislative për reformat që do të nxirren. Përmes mbështetjes së IPA-s, BE-ja siguron ndihmë financiare bujare për të mbështetur këto përpjekje dhe për të rritur përmirësimet në tërë Kosovën. Pa marrë parasysh se kush e formon qeverinë e re, BE-ja pret një përshpejtim dhe zbatim të agjendës për reforma të BE-së. Kosova ka një perspektivë të qartë evropiane. Njerëzit e Kosovës presin një udhëheqje të përgjegjshme që do të bëjë përparime të rëndësishme përgjatë rrugës evropiane. Tani u takon atyre udhëheqësve që ta bëjnë këtë”, ka thënë Apostolova. (B.H/Shuplaka)
Discussion about this post