FOTO/ Arratisen nga vrima poshtë tualetit të qelisë dy të dyshuarit për vrasje

Policia ka publikuar pamjet që tregojnë sesi dy të dyshuar për vrasje janë arratisur nga një burg në Kaliforni.

Santos Samuel Fonseca, 21 vjeç, dhe Jonathan Salazar, 20 vjeç, hapën një vrimë 55 centimetra poshtë tualetit të qelisë në burgun në qytetin e Salinas.

Policia tha se dy të rinjtë shfrytëzuan një vend që nuk mund të shihej nga oficerët. Të dy ishin në pritje të gjyqit për akuza të veçanta për vrasje kur u arratisën të dielën.

Autoritetet po kërkojnë për të arratisurit, të cilët mendohet se janë të armatosur dhe të rrezikshëm.

Zyra e sherifit ka ofruar një shpërblim prej 5000 dollarë për çdo informacion për vendndodhjen e të dyshuarve.

Fonseca akuzohet për vrasjen e Lorenzo Gomez Acosta, 37 vjeç dhe Ernesto Garcia Cruz, 27 vjeç, në një hapësirë kohore prej katër ditësh, në qershor 2018.

Ndërsa  Salazar akuzohet se ka qëlluar për vdekje Jaime Martinez, 20 vjeç, në tetor 2017.