Mbrëmjen e sotme, Ambasada Gjermane në Tiranë ka organizuar një pritje me rastin e 3 Tetorit, ditës së bashkimit të Gjermanisë ku morën pjesë ambasadorë, politikanë, dhe personazhe të njohur të jetës publike në vend.
Mes tyre kanë qenë edhe Kreu i Shtetit Ilir Meta, kryeministri, Edi Rama, kryeparlamentari Ruçi etj, ndërsa ajo çfarë prej kohësh nuk kishte ndodhur, është prezenca në një ambient të përbashkët të Ramës dhe Metës.
Ndërkohë që marrëdhëniet mes dy përfaqësuesve më të lartë të Shqipërisë janë prej muajsh në një tension të vazhdueshëm, kjo pritje me emrin “Gjermani” i ka bërë bashkë, pavarësisht se mes tyre nuk është konstatuar të ketë pasur ndonjë takim apo qoftë edhe shtrëngim duarsh.
Presidenti ka shpërndarë në rrjetet sociale edhe disa foto nga ky event por që me sa duke është kujdesur që përmes tyre të mos shihet prezenca e kryeministrit, ndërsa shkruan:
Kënaqësi të merrja pjesë sot në pritjen e organizuar nga Ambasada Gjermane në Tiranë, me rastin e 3 tetorit, Ditës së Bashkimit të Gjermanisë dhe t’i shprehja ambasadorit Peter Zingraf urimet më të ngrohta e të përzemërta për popullin mik gjerman. Shqipëria do vijojë të mbështetet fort në Gjermaninë mike dhe partnere strategjike.
Mirënjohje të thellë për kontributin e çmuar, të gjithanshëm dhe të përhershëm që Gjermania i ka dhënë Shqipërisë në procesin e integrimit europian, konsolidimin e shtetit të së drejtës dhe reformave demokratike.
(F.GJ/FAXWEB.AL)
Discussion about this post