Masa ekstreme ka marrë policia e Shtetit në ruajtje të qetësisë dhe rendit në 2 orët e parashikuara për Manifestimin e thirrur nga Presidenti Meta në Bulevardin ‘Dëshmorët e Kombit”.
Ndërsa presidenca prej ditësh ka deklaruar se do të jetë një tubim i qetë ku njerëzit do të mbajnë vetëm mimoza dhe flamuj, sërish qindra policë dhe forca speciale kanë rrethuar godinën e Kryeministrisë, ndërsa në tarracë janë instaluar dhe pajisje të ‘çuditshme’ për vëzhgim.
Ndërkohë sheshi ka nisur të mbushet me qytetarë të cilët mbajnë flamuj, mimoza dhe pankarta ku kërkojnë largimin e kryeministrit Rama.
Tubimit të Metës pritet t’i bashkohen të gjithë eksponentët e opozitës, edhe pse në tubim nuk parashikohet që të ketë fjalime politike, pasi simbolet dominuese janë ato kuqezi.
Në podium përveç Metës pritet të ngjiten dhe patriotë shqiptarë, avokatë dhe njerëz të së drejtës, ndërkohë që mjaft personazhe publike kanë deklaruar publikisht pjesëmarrjen në këtë takim.
Në shesh është vendosur dhe tavolina ku presidenti firmos zakonisht dekretet e tij, por mbetet ende e paqartë se cila do të jetë lëvizja e Metës gjatë ditës së sotme.
Pak kohë më parë ai shprehej se qytetarëve duhej t’i rikthehej e drejta e Referendumit, por nuk dihet nëse do të ketë sot një iniciativë të tillë.
Rreth 1000 efektivë të FNSH-së, Policisë dhe gardës do të zbresin sot në terren për të garantuar rendin dhe qetësinë gjatë manifestimit, ndërkohë që vetë presidenca ka angazhuar rreth 3 mijë persona që do të vendosin në krah shiritët kuqezi dhe do të garantojnë që gjithçka të jetë paqësore.
Discussion about this post