FOTO/ Dëmet nga tërmeti, për të njëjtin objekt dy raporte të ndryshme për godinën e Tatimeve dhe Hipotekës

Pas tërmetit të fuqishëm të 26 nëntorit janë shënuar dëme të shumta edhe në institucione.

Ndërkohë për drejtorinë Rajonale të Tatimeve në Tiranë janë kryer dy inspektime.Janë të njëjtët ekspertë që kanë inspektuar këtë objekt në datat 4 dhe 5 dhjetor.

Në inspektimin e datës 4 dhjetor, thuhet se ndërtesa ka dëmtime të riparueshme dhe është plotësisht funksionale, duke dhënë disa porosi për të bërë rregullime të vogla.

Por të njëjtët ekspertë janë kthyer sërish aty një ditë më vonë, në datën 6 dhjetor.

Në inspektimin e dytë, ata kanë vërejtur dëmtime të mëdha në strukturën e objektit në kolona dhe në soletë.

Kështu herën e dytë, inxhinieri konstruktor dhe arkitektja e kanë nxjerrë të papërdorshëm këtë objekt.

Me një akt-konstatimi ekpertët kanë vërejtur dëmtime të mëdha në strukturën e objektit në kolona dhe në soletë.

“Në vijim të Aktit të Konstatimit të Institutit të Ndërtimit në Ministrinë e Infrastrukturës dhe Energjisë, me Nr.55925 prot, datë 05.12.201 9, i cili mbas vlerësimit të të gjithë godinës 6-katëshe ku operon Drejtoria Rajonale Tatimore Tiranë, ka çertifikuar se objekti është i pabanueshëm, Drejtoria e Përgjithshme e Tatimeve bën me dije se:

Drejtoria Rajonale Tatimore Tiranë do të vijojë punën e saj në përmbushjen e të gjitha detyrave funksionale, në ambjentet e Drejtorisë së Shërbimit të Tatimpaguesve, me adresë Rruga “Nikolla Lena” (përballë shkollës Sabahudin Gabrani), Tiranë.

Të gjithë tatimpaguesit që administrohen nga DRT Tiranë, janë të lutur që për çdo komunukim të dorëzojnë kërkesat e tyre në kutinë postare që ndodhet në ambjentet e kësaj drejtorie, vend ku do të menaxhohen dhe do të ofrohen edhe shërbimet e të gjitha drejtorive të DRT Tiranë.

Menjëherë pas konstatimit paraprak të dëmit nga tërmeti i datës 26 nëntor, të gjitha shërbimet për tatimpaguesit janë ofruar pa ndërprerje në sportelet e shërbimit, në ambjentet e Drejtorisë së Shërbimit të Tatimpaguesit, Tiranë dhe do të vijojnë aty deri në një njoftim të dytë.

Administrata Tatimore falenderon tatimpaguesit për mirëkuptimin në këtë situatë të krijuar, duke ju siguruar se po bën çdo përpjekje të mundshme, për të adresuar një zgjidhje të qëndrueshme, në ofrimin e shërbimit në kushte optimale.”- njofton drejtoria e Tatimeve.