Tërmeti me magnitudë 6.4 ballësh që ka tronditur vendin tonë duke shkaktuar një tragjedi të pa parë prej vitesh, ka sensibilizuar shumë njerëz e vende të ndryshme të botës të cilët janë shprehur të pikëlluar për dramën që shkaktopi kjo tragjedi.
Së fundmi një solidarizim i tillë ka ardhur edhe nga Greqia, me tifozët e skuadrave të ndryshme që kanë marrë nisma për mbledhjen e ndihmave për shqiptarët. Pasi njoftuan se po mbledhin ndihma për të prekurit nga tërmeti, tifozët e AEK-ut kanë bërë një gjest tjetër të madh.
Ditën e sotme kur skuadra e tyre e basketbollit është duke luajtur me Promithean, ata kanë shpalosur një banderolë ku shkruajnë: “Lutuni për Shqipërinë, solidarizohemi me popullin shqiptar.”
Pikërisht edhe banderola është e shkruar në shqip, dhe kjo tregon se përveç ndihmave të mëdha për vendin tonë, tifozët e këtij ekipi nuk ngurojnë të tregojnë solidarizimin për të prekurit nga tërmeti.
