Mëngjesin e sotëm i gjithë vendi i zgjuar nën prezencën e shirave me intensitet të lartë. Deri tani janë raportuar përmbytje në disa zona në Gjirokastër.
Reshjet e dendura të shiut ka bërë që në të gjitha rrugët e qytetit të ketë probleme në qarkullim, madje disa prej tyre edhe janë bllokuar.
Niveli i lartë i ujit ka bërë që edhe rruga naciolane Gjirokastër-Kakavijë të bllokohet. Po ashtu raportohet prezencë të madhe uji ka edhe në rrugët hyrëse të qytetit.
Ndërkohë situata në Kukës përsa i përket përmbytjeve raportohet se rrugët e qytetit janë mbushur me ujë. Gjithashtu një defekt i shkaktuar në Fierzë ka lënë pa energji të gjithë qytetin që prej mbrëmjes së djeshme.
Sot përkeqësohet moti, MB jep alarmin: Rrezik përmbytje
Ministria e Punëve të Brendshme ka urdhëruar ngritjen e Shtabeve të Emergjencave në të gjithë vendin për shkak se duke filluar nga mesdita e sotme pritet një përkeqësim i motit, me reshje të shumta që mund të shkaktojnë përmbytje.
Buletinet e instituteve të specializuara meteorologjikë njoftojnë se përkeqësimi i motit mund të shoqërohet fillimisht me reshje me intensitet mesatar, që do të vijnë duke u shtuar.
Përveç përmbytjeve, reshjet mund të shkaktojnë edhe rrëshqitje të tokës në zona të caktuara. Situata pritet të përkeqësohet në datën 8 nëntor, sidomos në njësitë administrative të qarqeve Shkodër, Kukës, Dibër, Lezhë, Tiranë, Durrës, Elbasan, Fier, Vlorë dhe Gjirokastër.
Sipas parashikimeve të Instituteve Meteorologjike, pritet të ketë fryrje të lumenjve që rrezikojnë të dalin nga shtretërit e tyre. Ministria e Punëve të Brendshme ka urdhëruar Prefektët dhe përfaqësuesit e bashkive në të gjithë vendin që, përveç ngritjes së Shtabeve të Emergjencës, të vënë në gatishmëri të gjitha kapacitetet njerëzore e teknike-operacionale për të reaguar sipas situatës.
Ministria e Punëve të Brendshme këshillon shtetasit në zonat që mund të preken nga përmbytjet, të minimizojnë lëvizjet e panevojshme dhe sidomos të fëmijëve të vegjël, të pa shoqëruar nga të rriturit.
MPB kërkon nga shtetasit që t`u binden lajmërimeve të strukturave të pushtetit vendor dhe të japin ndihmesën e tyre ndaj këtyre strukturave.