Pas dy shpërthimeve të fuqishme në Luginën e Valbonës nga ana e kompanisë ‘Gener 2’ e cila po ndërton HEC-et e Ceremit dhe të Dragobisë, policia ka nisur hetimet pas denoncimit të banorëve.
Forcat e Rendit kanë bllokuar zonën ku ka pasur shpërthime dhe ka shoqëruar në polici dy inxhinierë të kompanisë ‘Gener 2’.
Shpërthimi ka qenë aq i fuqishëm saqë gurët kanë përfunduar deri afër banesave të banorëve.
Në një lidhje telefonike pak më parë për ‘Fax News’ anëtari i Shoqërisë Civile Dardan Metaliaj, tha se ka pasur dy shpërthime të fuqishme me diferencë 10-15 minuta, ku për pasojë është dëmtuar rrjeti elektrik.
“Është një shpërthim i fuqishëm, isha në shtëpi në atë moment në katin e parë dhe mu duk sikur shtëpia u shemb. Pas 10-15 minutash ka pasur një tjetër shpërthim edhe më të fuqishëm. Nuk ka patur asnjë njoftim nga firma dhe fatmirësisht nuk ka patur turistë duke kaluar sepse do të ishte shumë e rrezikshme”, tha ai.
Pas shpëthimeve banorë dhe anëtarë të Shoqërisë Civile kanë bllokuar rrugën për të kërkuar shpjegime në lidhje me situatën. Por me ardhjen e policisë ata e kanë liruar rrugën. Megjithatë, Metaliaj shtoi se nëse situata vijon të mbetet e njëjtë, rruga do të bllokohet sërish dhe do ketë protesta.
Sa i përket Valbonës, aktivisti tha se ajo që po ndodh atje me ndërtimin e HEC-eve nga ‘Gener 2’ është një masakër e vërtetë.
“Policia na tha që do zgjidh situatën dhe liruam rrugën, nëse nuk zgjidhet situata e bllokojmë prap, me Valbonën po bëhet masakër, kemi pasur kërcënime, me burg”, u shpreh aktivisti.
Kompania ‘Gener 2’ po ndërton HEC-et, pavarësisht protestave dhe reagimeve të shumta të ambientalistëve të cilët e kanë kundërshtuar pasi sipas tyre kjo do të shkretonte një nga perlat e Shqipërisë por edhe Europës.
https://www.youtube.com/watch?v=NKFB2jNuNB8
(B.H/Faxweb)
Discussion about this post