Një orë para mesnatës me vetëm votat e mazhorancës kaloi në Kuvend projektligji për teatrin, që nënkupton shembjen e godinës ekzistuese.
Kjo ka sjellë një protestë disa orëshe në ambientet e jashtme të Kuvendit nga ana e artistëve të cilët, edhe pse në lot, shprehen se ky nuk është fundi, pasi kauza e tyre për mbrojtjen e godinës nuk do të ndalet.
Ndërkohë që ky projektligj, i cilësuar gjerësisht si abuziv ka sjellë dhe përplasjen e parë në qeverinë Rama, teksa ministri për Diasporën Pandeli Majko, pati një konflikt me kryeministrin, për shkak se mësohet se deklaroi votën e tij kundër.
Më pas Majko ka lënë sallën para se projektligji të shkonte në votim, dhe kamerat e kanë fiksuar fytyrën e tij mjaft të acaruar.
Nga ana tjetër opozita qëndroi deri në fund në sallë, ndërsa në momentet e votimit deputetët e PD-së dhe LSI-së, së bashku bllokuan foltoren, ndërkohë që nuk kanë munguar as kartonët e kuq të hedhur në drejtim të qeverisë Rama.
Menjëherë kanë ndërhyrë forcat e gardës, të cilët kanë mbrojtur ministrat me dosje, ku siç shihet edhe në fotot e mëposhtme, Ditmir Bushati është ai që e ka përjetuar më së shumti këtë situatë.
Nga ana e mazhorancës nuk kanë votuar dy deputetë, që mungonin në Kuvend për arsye shëndetësore, Paulin Stërkaj dhe Spartak Braho, ndrërkohë që vihej re dhe mungesa e deputetes së PDIU-së Reme Lala.
(E.K/FAXWEB.AL)
