Emma Kelty, mësuesja britanike që këmbëngulte të vazhdonte udhëtimin e saj në lumin e Amazonës, pësoi fatin tragjik. 7 Burra e masakruan atë. Por çfarë ndodhi para se mësuesja që nuk hiqte dorë nga ëndrra e saj, të vritej barbarisht?
Fshatarët e zonës, 3 ditë para se ta gjenin të vdekur pasi ishte torturuar i ishin lutur të mos e vazhdonte udhëtimin vetëm, duke e ditur se çfarë rreziqesh i kanoseshin.
Të gjendur në vështirësi pasi nuk dinin anglisht, banorët e fshatit Sao Joao de Catua kishin përdorur ”Google translate” për t’i dhënë mesazhin, të cilën mësuesja e kishte kuptuar qartë por i kishte siguruar se më kot shqetësoheshin. Kishte qenë pikërisht një grua që dinte pak anglisht që e kishte çuar në shtëpinë e një kushëriri të saj për t’i përkthyer gjithçka kërkonte t’i thoshte, shkruan ”Daily Mail”.
Mësuesja kishte vendosur të udhëtonte e vetme 4 mijë milje nga burimi i lumit në derdhjen e tij në det me kajak. Ajo kishte bërë madje shaka me informacionin marrë nga banorët, në një status të sajin në ”Twitter”: ”Në 100 kilometra larg Coarit varka ime do të plaçkitet dhe unë do të vritem. Mirë”.
Banorët i kishin ofruar ndihmë, që një burrë prej tyre të shkonte me të, por ajo nuk kishte pranuar.
”Më duhet të shkoj, sa më shumë kohë shpenzoj me ju, aq më pak kohë më mbetet për të shijuar. Zemrat tuaja janë shumë të dashura, por më duhet të shkoj, faleminderit!”, u kish thënë për herë të fundit mësuesja, që u gjet e vdekur vetëm ditë më pas. Emma kishte bërë e vetme udhëtimin në polin e jugut.
Kjo është fotoja e fundit e saj, teksa ajo i përshëndeste me dorë. Tre burra janë arrestuar për vrasjen e saj. (V.G/SHUPLAKA)
