Efektivja e Forcave të Armatosura të Shqipërisë Zarife Hasanaj ka humbur jetën në Letoni, ndërsa komandanti i kontigjentit, Major Klodian Tanushi, dhe rreshter Julian Kapaj kanë mbetur të plagosur. Shkak për këtë ngjarje të rëndë dyshohet se është bërë shpërthimi i një mine.
Hasanaj ka qenë prej disa vitesh pjesë e forcave të Armatosura, dhe duket se këtë gjë e kishte pjesë edhe të rrjeteve të saj sociale, ku postonte vazhdimisht video nga aktivitetet e ndryshme, te të cilat ishte pjesë.
Pak ditë më parë teksa nisej për në Letoni ajo ka marrë urimet e familjarëve të saj që të kthehej shëndoshë, po mesa duket ky ka qenë misioni i fundit për të. ”Beteja” me minat ka rezultuar fatale, pasi shpërtimi i njërës prej tyre ka shkaktuar vdekjen e 27-vjeçares.
Veç Hasanajt, dhe ngushëllimeve për famijen e saj, lutjet e të gjithë shqiptarëve shkojnë për dy personat që mbetën të plagosur, të cilët ndodhen nën kujdesin intesiv të mjekëve.
“Një grup i kontigjentit të asgjesimit të municioneve dhe lëndëve eksplozive, gjatë kryerjes së detyrës së tyre, sot në ora 9.10 (ora 10.10 me orën lokale) janë dëmtuar nga shpërthimi i disa municioneve të paplasura. Ngjarja ka ndodhur gjatë kryerjes së detyrave luftarake, në bazën e NATO-s ku ishte zhvilluar një stërvitje ushtarake e një prej aleatëve.
Nga ky shpërthim është plagosur dhe më pas ka humbur jetën Nëntetare Zarife Muharrem HASANAJ. Të plagosur kanë mbetur komandanti i kontigjentit, Major Klodian Nikolla TANUSHI dhe Rreshter Julian Xhevat KAPAJ.
Sipas informaciomeve të deritanishme Major TANUSHI dhe Rreshter KAPAJ janë nën kujdesin maksimal të mjekëve, në bazën Camp Adazi, në Letoni.
Për ngjarjen e sotme jemi në kontakt të vazhdueshëm me autoritetet më të larta letoneze dhe të aleatëve tanë në mision“, njoftuan sot FA.
(E.K/FAXWEB.AL)
