Pas verës me temperatura ekstreme, stuhi shiu kanë përfshirë qytetin e Elbasanit.
Reshjet e dendura kanë bërë që uji të vërshojë në rrugë dhe të shkaktojë vështirësi në qarkullimin e automjeteve dhe udhëtarëve. Sasia e shiut në njësinë e kohës ka qenë aq e madhe sa ka shpërthyer pusetat në mjaft rrugë të qytetit pasi kanalizimet nëntokësore e kanë pasur të pamundur që të përballojnë ujin.
Sipas raportimeve rrebeshi i pazakontë i shiut ka shkaktuar probleme në qarkullim në aksin Elbasan-Librazhd-Qafëthanë dhe në disa akse dytësore që lidhin fshatrat me qytetet.
Reparti i zjarrfikseve dhe një grup pune i bashkisë Elbasan po punojnë për normalizimin e kësaj situate
Reshjet e shiut kanë sjellë edhe problemin e parë në qarkullim pasi një mjet tip Audi bëhet me dije se teksa ka qënë duke lëvizur në drejtim të Librazhdit, në aksin nacional Elbasan- Librazhd ka përfunduar në kanal. Mjeti ka dalë nga rruga konkretisht pranë urës së Lizës, ndërkohë që drejtuesi i mjetit mbeti i bllokuar për disa minuta në mjet. Por fatmirësisht ai është arritur të nxirret dhe mësohet se nuk ka pësuar lëndime të mëdha.
(F.GJ/FAXWEB.AL)
