Një gjykatë në Paris dënoi të hënën udhëheqësen e ekstremit të djathtë Marine Le Pen dhe tetë eurodeputetë të tjerë për shpërdorim të fondeve publike. Dënimet ende nuk janë bërë publike, raporton Corriere della Sera. Dëmi total nga veprimet e të pandehurve që u shpallën fajtorë llogaritet në 2.9 milionë euro.
Liderja e Tubimit Kombëtar (RN) mund të përballet me pesë vjet burg, tre prej të cilave do të pezullohen dhe një gjobë prej 300 mijë eurosh, sipas kërkesave të prokurorëve. Ajo gjithashtu përballet me një ndalim pesë-vjeçar për të kërkuar poste publike, gjë që mund ta pengojë atë të kandidojë për presidente në vitin 2027. “Është vdekja ime politike ajo që kërkohet”, tha Le Pen në nëntor 2024.
E vetëdijshme për rëndësinë e vendimit për partinë dhe për rrugën e gjatë të së djathtës ekstreme drejt pushtetit, të hënën në mëngjes, përpara vendimit të gjykatës, Marine Le Pen ngriti për herë të parë mundësinë që Jordan Bardella të ishte kandidati i Tubimit Kombëtar për zgjedhjet presidenciale të 2027-ës.
“Jordan ka aftësinë për të qenë president i Republikës”, tha kreu i grupit parlamentar të partisë.
Pas dënimit, pritet ankimim. Duke pasur parasysh kohët e zakonshme gjyqësore, gjykimi i dytë do të zhvillohet brenda një viti, pra me vendim jo më herët se vjeshta 2026, pak muaj para zgjedhjeve presidenciale.
Le Pen u akuzua se kishte punësuar katër asistentë fiktive kur ishte eurodeputete (2004-2017). Në realitet, ata dyshohet se kanë punuar për Tubimin Kombëtar (FN). Asistentët, të cilët paguheshin nga Parlamenti Evropian, dyshohet se kryenin detyra të lidhura me menaxhimin e partisë dhe jo me punë të lidhura me veprimtarinë parlamentare evropiane, siç kërkohet normalisht për poste të tilla.
Përveç dyshimeve për punësim fiktive, Le Pen akuzohet se ka qenë në qendër të një “sistemi përvetësimi” të organizuar dhe të centralizuar të parave të paguara nga BE për partinë e saj, midis 2004 dhe 2016.
