Ftesa për të marrë mandatin e deputetit, një tjetër emër i njohur refuzon të futet në Parlament

Një tjetër kandidat për deputet nga lista e Partisë Demokratike në zgjedhjet e përgjithshme të vitit 2017, ka refuzuar të marrë mandatin e deputetit të cilit i rezervohej në bazë të ligjit për plotësimin e vakancave pas djegies së mandateve nga opozita.

Erion Piciri e ka bërë publik vendimin e tij përmes një statusi në rrjetet sociale, ku shkruan se është pro djegies së mandateve dhe përgëzon ndërkohë të gjithë deputetët që hoqën dorë nga ky post.

Piciri e argumenton refuzimin e kërkesës së KQZ për të marrë postin e deputertit në Kuvendin e Shqipërisë kështu: Vështirë të gjeje aty ndonjë personazh që sjell erë ndryshimi. Krahasojini me deputetë a kongresmenë të vendeve të tjera dhe do kuptoni nivelin e përfaqësimit.

Reagimi i plotë:

PRO DJEGIES SE MANDATEVE Përgëzime të gjithë atyre që dogjen mandatet e deputetëve. Njeriu duhet të njohi kufizimet e veta. Veshtire te gjeje aty ndonje personazh qe sjell ere ndryshimi. Krahasojini me deputete a kongresmene te vendeve te tjera dhe do kuptoni nivelin e perfaqesimit. Mediokritete pa fund te imponuara si modele te elites politike kombetare.

Deputeti kudo eshte personalitet, mendimtar dhe orator, ketu ka perfunduar ne dordolec i varur ne kremastarin e kryetareve. Mire eshte te ikin edhe shume te tjere nga ana e pushtetit. Parlamentit duhet t’i kthehet serioziteti dhe profesionalizmi i njerezve me vokacion politik.

Kujtojmë se Erion Piciri ka marrë pjesë në garën e fundit për zgjedhjen e kryetrarit të Partisë Demokratike ku në këtë garë kandiduan: Lideri demokrat Lulzim Basha, ish-kreu i PD-së, Eduard Selami dhe dy anëtarët – Astrit Sinanaj e Erion Piciri, ku Basha fitoi me një avantazh të thellë.

Ai gjithashtu ka qenë një kritik i vazhdueshëm e Bashës që nga humbja e zgjedhjeve lokale në vitin 2015 nga ana partisë më të madhe opozitare në vend.

Ndërkohë, gjatë ditës së sotme i fundit që dorëzoi formularin e dekriminalizmit në KQZ, ishte kandidati për deputet në zgjedhjet e kaluara parlamentare, Ligoraq Karamelo (Lexo këtu)

Më herët janë betuar në Kuvend katër deputetët e rinj të LSI-së, që me shumë gjasa do të përjashtohen nga kjo forcë politike. Ylli Shehu  Aurora Mara, Enver Roshi dhe Edmond Rrushi, kanë thënë ‘’betohem’’ përpara Gramoz Ruçit dhe kanë, marrë duartokitjet e të gjithë socialistëve, që kanë qenë të pranishëm në sallë (Lexo këtu).

Ndërkohë që deri më tani ka 10 kandidatë nga listat e PD-së dhe të LSI-së që kanë shprehur gadishmërinë për të marrë mandatet e lëna nga deputetët e opozitës së bashkuar (Lexo këtu).

(F.GJ/FAXWEB)