Fuga: E gjithë Shqipëria është një Zharrëz që e kanë kaluar në sharrë, ja kush e ka fajin

Akademiku Artan Fuga ka reaguar për protestën e banorëve të Zharrëzës dhe veprimet apo mosveprimet që ka bërë qeveria shqiptare deri tani. Ai e ka quajtur gjithë Shqipërinë një Zharrëz të madhe duke thënë se nuk e ka fajin as kompania dhe as kontrata e lidhur me të por mungesa e një drejtësie që të vendosë përpara përgjegjësisë ministrin përkatës.

“Nuk e ka fajin as kontrata ore jo, kushdo parti ta ketë firmosur. Këto janë dytësore! Se nuk ka kontratë që lejon t’u shkatërrosh shtëpitë njerëzve aq sa ata të mos të gjejnë të drejtën dhe të shtrihen pastaj në pllakat e bulevardit si në Mesjetë! Kur nuk ka një përfaqësues të drejtësisë që t’a kapi për prapanice, vithesh, të ndejturash, ministrin e sektorit dhe ta rrasi brenda për krimin e mosveprimit ndaj shkatërrimit masiv të pronës private, të shkatërrimit të mjedisit, të dëmtimit masiv të shëndetit publik, duke i hapur një proces gjyqësor shembullor, mirë e ka kushdo që gjen shesh e bën përshesh”, shkruan Fuga.

SHKRIMI I PLOTË:

Për tërmetet e vegjël që kanë shkatërruar shtëpitë në Zharrës nuk e ka fajin kompania ore jo. Kompania atë punë ka! Ajo metodë e nxjerrjes së naftës ato shkakton. Dihet ajo!

Nuk e ka fajin as kontrata ore jo, kushdo parti ta ketë firmosur.

Këto janë dytësore!

Se nuk ka kontratë që lejon t’u shkatërrosh shtëpitë njerëzve aq sa ata të mos të gjejnë të drejtën dhe të shtrihen pastaj në pllakat e bulevardit si në Mesjetë!

Kur nuk ka një përfaqësues të drejtësisë që t’a kapi për prapanice, vithesh, të ndejturash, ministrin e sektorit dhe ta rrasi brenda për krimin e mosveprimit ndaj shkatërrimit masiv të pronës private, të shkatërrimit të mjedisit, të dëmtimit masiv të shëndetit publik, duke i hapur një proces gjyqësor shembullor, mirë e ka kushdo që gjen shesh e bën përshesh!

Pastaj tallin çunat e Tiranës prapanicën me fatkeqët e Zharrësit!

E gjithë Shqipëria është një Zharrës i madh, e kanë kaluar në sharrë!

Ne nuk kemi as të drejta, as ku të ankohemi, as të mbrojmë pronën, paratë, vendet e punës, veten!

(M.D/ Shuplaka)