Fuga i kundërpërgjigjet Imamit: Republika e Re nuk është tezë marksiste

Analisti Artan Fuga ka reaguar përmes një shkrimi të tij për t’iu përgjigjur kritikëve të Republikës së Re, programit që Basha publikoi dhe mbrojti gjatë gjithë fjalës së tij tri muaj në çadër dhe në fushatën elektorale të zgjedhjeve të 25 qershorit.

Ai reagon për cilësimin “tezë marksiste” të këtij programi nga ana e demokratëve Arben Imami dhe Edith Harxhi. I ftuar në emisionin “Të paekspozuarit” mbrëmjen e djeshme, Arben Imami u shpreh ndër të tjera: “Bojkot i demokratëve ka ulur votat e PD-së dhe ka rritur përqindjet numrin e deputetëve në parlament. Për shkak të programit, tezë marksiste, për shkak të heqjes së simbolikave të PD… Ditën që ka mbyllur mitingun, nuk ka thënë rroftë PD-ja.” Të njëjtin qëndrim mbajti edhe demokratja Edith Harxhi dje në “Opinion” duke e cilësuar Republikën e Re një tezë marksiste.

Në përgjigjen e tij për Imamin, Fuga shkruan se “kur dikush shprehet se çdo kërkesë për ta ndryshuar këtë kuadër kushtetues me një model tjetër, pra Republikë e Re, është kërkesë marksiste, kupton se sa e ndërlikuar është gjendja. Sipas Fugës, kjo tregon “mosnjohje të historisë dhe marrje në mbrojtje të një sistemi ku deputeti është një shkruajtës, skrib, i vendimeve të qeverisë”.

Kujtojmë se analisti Artan Fuga ka qenë ndër të parët që ka mbështetur një program ndryshe, më të lartë siç shprehet ai, siç është edhe programi Republika e Re e Lulzim Bashës.

Reagimi i Artan Fugës:

Kushtetuta që kemi ka sjellë degradimin politik, degjenerimin e sistemeve qeverisëse, autoritarizmin dhe përjashtimin e qytetarit nga pjesëmarrja.

Kur dikush thotë sot se cdo kërkesë për ta ndryshuar këtë kuadër kushtetues me një model tjetër, pra me një “republikë të re”është “kërkesë marksiste”, sikurse ndodhi te emisioni i z. Ylli Rakipi, “Të Paekspozuarit”, atëhere kupton se sa e ndërlikuar është gjendja që shfaq në publik partia demokratike.

Dashje pa dashje kjo tregon mosnjohje të historisë, marrje në mbrojtje të një sistemi ku deputeti është një shkruajtës, skrib, i vendimeve të qeverisë dhe Kuvendi rregjistrues i vendimeve të partive politike.

Kështu ka rrezik të mos kemi veçse një përplasje mes humbësve të 2017 dhe humbësve të 2013!

Modelet e demokracisë janë nga më i ulti te më i larti, ku kalimi nga një model te tjetri është një nga vlerat e mëdha që na vjen qysh nga mendimi i Aristotelit, Makiavelit, Hobessit, e deri te mendimtarët dhe politikanët e sotëm.

Në historinë politike të demokracive të mëdha europiane ka një evoluim disa shekullor të modeleve republikane! Republika të para, të dyta, të treta, të katërta, të pesta, etj.

Teknologjia sociale pasi e përdor një model, e konsumon atë dhe përqafon një model më të lartë.

Po vazhdoi kështu atëhere rrezikojmë tëmos kemi veçse humbësit e kohëve të ndryshme do të debatojnë me njeri tjetrin se kush është më shumë humbës!

(XH.A/SHUPLAKA)