Reagon Artan Fuga, akademik dhe ish-shef i Departamentit të Gazetarisë dhe Komunikimit, lidhur me largimin e Alfred Lelës nga ”Mapo”.
”Nuk ka lajm! A mos vallë ish-drejtori zbatonte një vijë të pavarur editoriale?!”, thekson Fuga, duke shtuar se e gjitha kjo nuk ka lidhje me censurën e se kontrolli i medieve është gjetiu.
”Doktrinë liberale e pastër, hiç puniste ! Oferta i përgjigjet kërkesës më të mirë në treg!”, e quan më tej Fuga.
KOMENTI I PLOTË:
Nuk ka ngjarje, as lajm nga Mapoja
Unë nuk e kuptoj se ku është problem kontrolli mediave dhe liria e shtypit kur pronari i mediave Mapo nuk rinovon kontratën me ish drejtorin e gazetës Mapo!
Censura dhe kontrolli i mediave është gjetiu! Mos krijoni as heronj, as viktima, kur nuk ka të tillë.
A mos valle ish drejtori i Mapo-s ishte një person që zbatonte një vijë editoriale të pavarur nga pronari i tij kur ishte i punësuar atje si drejtor?
Apo të pavarur nga politika?
Le të bënte shakà ndonjë gazetar, pedagog, a bashkëpuntor vullnetar, i vjetër apo i ri, të dilte nga linjat e vijës politike të Mapos!
Në vijat themelore monitorimi që bëjnë studentët në punë të pavarur tregon se statistikisht nuk ishte e mundur.
Asnjë e dhënë shkencore nuk na flet për një politikë pavarësie deri tani. Hiç, asnjë e dhënë. Zero!
Nëse ”Mapo”-ja forcon servilizimin ndaj kryeministrit Rama dhe i ul peshën e përfaqësimit atje të liderëve të tjerë politikë, këtu kemi të bëjmë me një riorientim politik editorial të kësaj gazete dhe të këtyre mediave, por jo një problem me lirinë e mediave brenda Mapos.
Kemi të bëjmë me një problem me komercializimin e balancuar të hapësirave mediatike ndaj politikës, por jo një problem me pavarësinë e mediave ndaj pronarëve dhe politikës.
Doktrinë liberale e pastër, hiç puniste ! Oferta i përgjigjet kërkesës më të mirë në treg!
Tjetër është ndryshimi i një kahu politik i një mediaje, dhe tjetër problemi i pavarësisë së saj si media.
Nuk dua t’i fus në një thes.
Pavarësia e mediave nuk zgjidhet me persona, me emra të përveçëm, por me një strukturë të mirëmenduar të pronësisë, të transparencës financiare, të statusit të gazetarit, etj.
E kush tha se me drejtorin e ri ”Mapo”-ja nuk do të luaj njëherë majtas dhe një herë djathtas!
Mos t’i rrëshkasi këmba kryeministrit Rama, se do ta shohi mirë si do t’i a hedhi në rrugë ”Mapo”-ja të gjitha tepricat që ka në magazinë. Se mos e ka gjë Mapoja të luajë! Burri, luan, edhe Mapoja luan, edhe muri luan.
Sikur nuk e di ai xhanëm!
Censurim i mediave? Po, patjetër, mediat janë të sipërcensuruara, por nuk jemi naivë të vemë gishtin te ish drejtori i ”Mapo”-s. Atë e pyet si është puna? Ai deklaron se çdo gjë është normale, mbaroi kontrata.
Çfarë mbrojtje ka nevojë t’i jepet atij politikisht dhe moralisht kur ngjarjen vetë ai e quan si një marrëdhënie e thjeshtë pune. Kontratë.
Madje vazhdon të mbetet brenda strukturave të ”Mapo”-s.
Ik nga Mapua dhe bie në Mapo.
Si me një drejtor si me një tjetër, si me drejtor si pa drejtor, veç një media të pavarur nga pronari, nga politika, nga qeveria, nga influenca e të fortëve në politikë nuk kam parë atje.
Sa për dijeni, sikurse e kam shprehur, ”Mapo”-n unë nuk e lexoj dot fare.
Sigurisht, aq më keq për mua.
