Që në orët e para të mëngjesit, stadiumi i qytetit të Fushë-Krujës është mbushur plot me besimtarë myslimanë, të cilët janë mbledhur për faljen e namazit të Kurban Bajramit – një nga festat më të rëndësishme në kalendarin islam.
Ceremonia fetare është udhëhequr nga Hoxha Muharrem Vrana dhe Myftiu i zonës, Dritan Rrahmani, të cilët kanë drejtuar lutjet dhe kanë dhënë mesazhe paqeje, solidariteti dhe mirësie për besimtarët dhe shoqërinë në tërësi.
Gjatë kësaj dite, shumë besimtarë janë përgatitur për therjen e kurbanit, një akt që simbolizon devotshmërinë dhe përkushtimin ndaj Zotit, si dhe ndarjen e begative me të afërmit dhe nevojtarët.
Kurban Bajrami është një moment reflektimi, faljeje dhe afrimi me Zotin, por edhe me njëri-tjetrin. Atmosfera festive dhe bashkimi shpirtëror në Fushë-Krujë tregojnë edhe një herë rëndësinë e kësaj feste në jetën shpirtërore dhe kulturore të komunitetit.
