Futbollistët e mbledhur për të luajtur ndeshjen e sotme të bamirësisë për banorët e prekur nga tërmeti kanë vendosur t’i takojnë ata para se të zbresin në fushë.
Ata udhëtuan drejt Thumanës e Bubqit, ku shtrënguan duart me familjet që u dëmtuan nga tërmeti i 26 Nëntorit dhe iu shprehën mbështetjen e tyre.
Legjenda e futbollist shqiptar, Altin Rraklli tha për “FaxNews” se kjo nismë e Andi Lilës është shumë e mirë, ndërsa kërkoi që tifozët të jenë sa më të shumtë në stadium që edhe të ardhurat të rriten.
“Nuk besoj që ka shqiptar që ndohet jo i përfshirë në këtë siklet që na ra si komb. Unë jam shumë i gëzuar dhe shumë falenderues për Andin që na bëri pjesë të kësaj nisme. Zoti jua bëftë sa më të lehtë atyre që ju ikën të afërmit.
Secili të vijë në stadium dhe të japë kontributin e tij. Ne duam të kënaqim ata njerëz që do të jenë në stadium. Nuk e di si janë bërë organizimet, por mua nëse nuk më thërrisnin nuk do të më mbetej qejfi. Ka shumë emra që mungojnë sepse në Shqipëri ka shumë futbollistë që meritojnë të marrin pjesë”, tha ai.
Të njëjtën thirrje për pjesëmarrje e pati edhe kapiteni i kombëtares tonë për ndeshjen e sotme, Foto Strakosha.
“Është një kauzë e veçantë dhe jemi të bindur të gjithë që duhet ta mbështesim. Shpresojmë që të ketë sa më shumë njerëz në stadium që të ketë sa më shumë ndihma”, deklaroi Strakosha për “FaxNews”.
Edhe Erjon Bogdani u shpreh i gatshëm për të dhuruar për familjet e prekura nga tërmeti. “Nuk e di nëse do të shënoj apo jo, por unë jam gati për të ndihmuar vendin tim, sidomos në këtë kohë sepse tërmeti qe tragjedi. Jo vetëm unë, por të gjithë çunat që kanë marrë pjesë sot do të jenë gati për ta ndihmuar këtë vend. Rëndësi ka që ne kemi ardhur këtu për të kontribuuar për këtë vend”, tha Erjon Bogdani.
Discussion about this post